വഴിപാടായ ആറന്മുള വള്ള സദ്യ പാർത്ഥസാരഥിക്ക് സമർപ്പിച്ച് സൂപ്പർ താരം ദിലീപ്. ഉമയാറ്റുകര പള്ളിയോടത്തിനായിരുന്നു ദിലീപ് വള്ള സദ്യ സമർപ്പിച്ചത്. പത്മസരോവരം ദേശം, ഗോപാലകൃഷ്ണൻ, ആലുവ എന്ന വിലാസത്തിലായിരുന്നു വള്ള സദ്യ താരം നേർന്നത്.
ചടങ്ങുകളുടെ ഭാഗമായി പാർത്ഥസാരഥി ക്ഷേത്രത്തിലെത്തി ദർശനം നടത്തി പ്രസാദവും സ്വീകരിച്ചു. കൂടാതെ വഴിപാട് സമർപ്പണ ചടങ്ങുകളുടെ ഭാഗമായി ക്ഷേത്ര ഗജമണ്ഡപത്തിലെത്തി നെൽപറ നിറച്ചു. തുടർന്ന് പള്ളിയോടത്തിൽ ചാർത്തുവാനുള്ള ഹാരം ശ്രീകോവിലിൽ നിന്നും സ്വീകരിച്ചു. ആചാരപ്രകാരം പള്ളിയോടത്തിന്റെ ക്യാപ്റ്റന് ഹാരം നൽകി. ആചാര പ്രകാരം വാദ്യമേളങ്ങളുടെയും വഞ്ചിപ്പാട്ടിന്റെയും അകമ്പടിയിൽ കരക്കാരെ തിരുമുറ്റത്തേക്ക് ആനയിച്ചു.
കരക്കാർ വഞ്ചിപ്പാട്ടിനൊപ്പം ചോദിച്ച വിഭവങ്ങൾ നൽകി എല്ലാവർക്കുമൊപ്പം സദ്യയും കഴിച്ചിട്ടാണ് ദിലീപ് മടങ്ങിയത്. ബന്ധുക്കളും സുഹൃത്തുക്കളുമടങ്ങുന്ന ഇരുപതോളം പേർ താരത്തിനൊപ്പം വള്ളസദ്യയിൽ പങ്കെടുത്തു.
Post Your Comments