സംശയമില്ല, ജയസൂര്യയാണ് ഇക്കൊല്ലത്തെ തിരുവോണ സൂര്യൻ: പ്രശംസകളുമായി ജോയ് മാത്യു

കർഷകരുടെ ദുരിതം രണ്ട് മന്ത്രിമാരെ തന്നെ വേദിയിലിരുത്തി നിശിതമായി വിമർശിച്ച നടൻ ജയസൂര്യയെ പ്രശംസിക്കുകയാണ് കലാ രം​ഗത്തുള്ളവർ.

പാവപ്പെട്ട കർഷകരുടെ പ്രശ്നം പുറം ലോകം ഇങ്ങനെയെങ്കിലും അറിയട്ടെ എന്നാണ് സോഷ്യൽ മീഡിയയിൽ ജനങ്ങൾ പറയുന്നത്. അധികാരികളുടെ പുറം ചൊറിയലല്ല, ദുരിതമനുഭവിക്കുന്നവരുടെ നിസ്സഹായാവസ്ഥ അവരെ ബോധിപ്പിക്കുകയാണ് വേണ്ടത് , തമ്പ്രാനെ മുതുക് കുനിച്ചു വണങ്ങിയാലേ എന്തെങ്കിലും നക്കാപ്പിച്ച കിട്ടൂവെന്ന് കരുതുന്നവർക്കിടയിൽ നടത്തിയ ജനകീയ വിചാരണയോടെ ജയസൂര്യ ആ പേരുപോലെ ജയിച്ച സൂര്യനായി എന്നാണ് മുതിർന്ന നടനായ ജോയ് മാത്യു പറയുന്നത്.

കുറിപ്പ് വായിക്കാം

മന്ത്രിമാരുള്ള വേദിയിൽ പഞ്ചപുച്ഛമടക്കിതൊഴുതു താണുവണങ്ങി നിൽക്കുന്ന കലാ-സാഹിത്യകാരാണെങ്ങും. ഇപ്പോഴും രാജവാഴ്ചയാണെന്നും തമ്പ്രാനെ മുതുക് കുനിച്ചു വണങ്ങിയാലേ എന്തെങ്കിലും നക്കാപ്പിച്ച കിട്ടൂവെന്ന് കരുതുന്നവർക്കിടയിൽ നടത്തിയ ജനകീയ വിചാരണയോടെ ജയസൂര്യ ആ പേരുപോലെ ജയിച്ച സൂര്യനായി.

അധികാരികളുടെ പുറം ചൊറിയലല്ല, ദുരിതമനുഭവിക്കുന്നവരുടെ നിസ്സഹായാവസ്ഥ അവരെ ബോധിപ്പിക്കുകയാണ് വേണ്ടത് എന്ന ശരിയായ തീരുമാനം പ്രവൃത്തിപഥത്തിൽ കൊണ്ടുവന്ന ജയ സൂര്യയാണ് ഇക്കൊല്ലത്തെ തിരുവോണസൂര്യൻ!