ജയം രവിയുടെ നായികയാകാൻ മലയാളി നടി നിത്യ മേനോൻ

അരുൾമൊഴി വർമ്മൻആയി ‘പൊന്നിയിൻ സെൽവൻ’ ചിത്രത്തിൽ പ്രേക്ഷകരെ വിസ്മയിപ്പിച്ച ജയം രവിയുടെ വരാനിരിക്കുന്ന ചിത്രത്തിൽ മലയാളി താരം നായികയായെത്തുന്നു.

ജയം രവി പുത്തൻ ചിത്രത്തിനായി നിത്യാ മേനോനുമായി ഒന്നിക്കുന്നു എന്നതാണ് ഇപ്പോൾ പുറത്ത് വരുന്ന വാർത്തകൾ. കൃതിഗ ഉദയനിധിയാണ് സംവിധാനം ചെയ്യുന്നത്. ‘ജെആർ 33 എന്നാണ് താൽക്കാലികമായി ഇട്ടിരിക്കുന്ന പേര്. കൃതിക ഉദയനിധി സംവിധാനം ചെയ്യുന്ന മൂന്നാമത്തെ ചിത്രമാണിത്. എ ആർ റഹ്മാനാണ് ചിത്രത്തിന് സം​ഗീതം നൽകുക. കൃതിക സംവിധാനം ചെയ്ത പേപ്പർ റോക്കറ്റ് എന്ന വെബ് സീരീസ് ഹിറ്റായി മാറിയിരുന്നു. തമിഴിൽ ഏറെ ആരാധകരുള്ള മുൻനിര നടിയാണ് മലയാളിയായ നിത്യ മേനോൻ. താരത്തിന്റെ ക്രെഡിറ്റിൽ ഒട്ടേറെ തമിഴ് വിജയ ചിത്രങ്ങളാണുള്ളത്. സൂപ്പർ നായകൻ ധനുഷിനൊപ്പമെത്തിയ തിരുച്ചിതമ്പലം എന്ന ചിത്രം വൻ വിജയമായി മാറിയിരുന്നു.

തിരുച്ചിതമ്പലത്തിലെ ​ഗാനങ്ങളും ട്രെൻഡിംങ് ലിസ്റ്റിലെത്തിയിരുന്നു. റീൽസുകളിലും മറ്റും ഏറെ കാലം പ്രേക്ഷകർ കൊണ്ടാടിയ ​ഗാനവും ഈ ചിത്രത്തിലുണ്ടായിരുന്നു. തമിഴിലെ ജനപ്രിയ നടനായ ജയം രവിയും മുൻ നിര നടിയായ നിത്യ മേനോനും ഒന്നിക്കുന്ന ചിത്രത്തിനായി കാത്തിരിക്കുകയാണ് ആരാധകർ.