സുഹൃത്ത് മനോബാലയെ അവസാനമായി കാണാനെത്തി ഇളയദളപതി

കഴിഞ്ഞ ദിവസമാണ് പ്രശസ്ത ഹാസ്യ നടനും സംവിധായകനുമായ മനോബാല അന്തരിച്ചത്. 40 ൽ അധികം ചിത്രങ്ങളാണ് മനോബാല സംവിധാനം ചെയ്തിരുന്നത്.

നിരവധി ചിത്രങ്ങളിൽ ഹാസ്യതാരമായും മനോബാല അഭിനയം കാഴ്ച്ചവച്ചു. കരൾ സംബന്ധമായ രോ​ഗത്തെ തുടർന്നാണ് താരം അന്തരിച്ചത്. 69 ആം വയസ്സിൽ ചെന്നൈയിൽ വച്ചായിരുന്നു താരം അന്തരിച്ചത്.

പലരും സോഷ്യൽ മീഡിയയിലൂടെ അന്ത്യാഞ്ജലി അർപ്പിച്ചിരുന്നു. സിനിമാ താരങ്ങളും സുഹൃത്തുക്കളും അടക്കം വൻ താരനിരയാണ് അവസാനമായി താരത്തെ കാണാനെത്തിയത്.

താരത്തെ അവസാനമായി കാണുവാൻ വിജയ് അടക്കമുള്ളവർ എത്തി. വിജയ്ക്കൊപ്പം നിരവധി ചിത്രങ്ങളിൽ മനോബാല വേഷമിട്ടിട്ടുണ്ട്. മനോബാലയെ കാണുവാൻ എത്തിയ വിജയുടെ ചിത്രങ്ങളാണ് സോഷ്യൽ മീഡിയയിൽ വൈറലാകുന്നത്.

പ്രിയതാരത്തെ കണ്ടതിന് ശേഷം മനോബാലയുടെ കുടുംബാംഗങ്ങളെയും കണ്ട് അനുശോചനം രേഖപ്പെടുത്തിയിട്ടാണ് സൂപ്പർ താരം വിജയ് മടങ്ങിയത്.

ശവസംസ്‌കാര ചടങ്ങിൽ വിജയ് എത്തിയതിന്റെ വീഡിയോകൾ കൂടാതെ, സെറ്റിൽ നിന്നുള്ള അവരുടെ ത്രോബാക്ക് ചിത്രങ്ങളും സോഷ്യൽ മീഡിയയിൽ വൈറലായിട്ടുണ്ട്. സംവിധായകനായ ലോകേഷ് കനകരാജ് സംവിധാനം ചെയ്യുന്ന വിജയ്‌യുടെ വരാനിരിക്കുന്ന ചിത്രമായ ലിയോയിലും മനോബാല അഭിനയിച്ചിട്ടുണ്ട്.

മനോബാലയുടെ മരണത്തിൽ സൂപ്പർ താരങ്ങളായ രജനികാന്തും കമൽഹാസനും മറ്റ് സഹതാരങ്ങളും സഹപ്രവർത്തകരും അനുശോചനം രേഖപ്പെടുത്തി. തന്റെ പ്രിയ സുഹൃത്തിന്റെ മരണത്തിൽ അനുശോചനം രേഖപ്പെടുത്തുകയും നടന്റെ കുടുംബത്തോട് അനുശോചനം അറിയിക്കുകയും ചെയ്യുന്നതായി രജനീകാന്ത് ട്വീറ്റ് ചെയ്യുകയും ചെയ്തു.