‘നവരസത്തിന്റെ കോപ്പിയല്ലെന്ന് പറയാനാകില്ല’: വരാഹരൂപത്തിന് വീണ്ടും വിലക്ക് ഏർപ്പെടുത്തി ഹൈക്കോടതി

തൈക്കുടം ബ്രിഡ്ജിന്റെ നവരസം കോപ്പിയടിച്ചിട്ടില്ലെന്ന ഹർജിക്കാരുടെ വാദം ഈ ഘട്ടത്തിൽ അംഗീകരിക്കാനാകില്ലെന്നും, ഇടക്കാല ഉത്തരവോ അന്തിമ ഉത്തരവോ ഉണ്ടാകുന്നതുവരെ വരാഹ രൂപം കാന്താരയിൽ ഉൾപ്പെടുത്തരുതെന്നും ഹൈക്കോടതി ഉത്തരവ്. പ്രാഥമിക അന്വേഷണത്തിൽ കോപ്പിയടി സംശയിക്കുന്നുണ്ടെന്ന് പറഞ്ഞ കോടതി, ഇക്കാര്യത്തിൽ കൂടുതൽ അന്വേഷണം ആവശ്യമാണെന്ന് വ്യക്തമാക്കിയാണ് ഋഷഭ് ഷെട്ടി ചിത്രം കാന്താരയിലെ വരാഹരൂപത്തിന് വീണ്ടും വിലക്കേർപ്പെടുത്തിയത്.

നിർമ്മാതാവിനും സംവിധായകനും മുൻകൂർ ജാമ്യം അനുവദിച്ചുള്ള ഉത്തരവിലാണ് കോടതി പരാമർശം. നിയമം 1956 പ്രകാരമുള്ള കേസിലാണ് വരാഹരൂപം എന്ന ഗാനവുമായി ബന്ധപ്പെട്ട കോപ്പിയടി ആരോപണങ്ങളിൽ പകർപ്പവകാശ ജസ്റ്റിസ് എ ബദറുദ്ദീൻ മുൻകൂർ ജാമ്യം അനുവദിച്ചത്. മാതൃഭൂമി പ്രിന്റിംഗ് ആൻഡ് പബ്ലിഷിംഗ് കമ്പനി ലിമിറ്റഡിന്റെ ഉടമസ്ഥതയിലുള്ള കപ്പ ടിവിക്ക് വേണ്ടി തൈക്കുടം ബ്രിഡ്ജ് ബാൻഡ് അവതരിപ്പിച്ച നവരസത്തിന്റെ കോപ്പിയാണ് വരാഹരൂപം എന്നാണ് ആരോപണം. എന്നാൽ പകർപ്പവകാശ ലംഘനം സംബന്ധിച്ച വിഷയത്തിൽ അന്തിമ തീരുമാനമെടുക്കേണ്ടത് ബന്ധപ്പെട്ട സിവിൽ കോടതിയാണ്.

ജില്ലാ കോടതി ഉത്തരവുകൾ ചോദ്യം ചെയ്ത് മാതൃഭൂമിയും തൈക്കുടവും നൽകിയ ഹർജികളും ഹൈക്കോടതിയുടെ പരിഗണനയിലാണ്. കൂടാതെ പകർപ്പവകാശ ലംഘനം ആരോപിച്ച് പരാതിക്കാർ ഇതിനകം രണ്ട് വ്യത്യസ്ത സിവിൽ ഹർജികൾ ഫയൽ ചെയ്തിട്ടുണ്ടെന്ന് സിനിമാ സംവിധായകനും നിർമ്മാതാവും ഹൈക്കോടതിയെ അറിയിച്ചു. ഈ ഹർജികൾ കോഴിക്കോട്, പാലക്കാട് ജില്ലാ കോടതികളാണ് ആദ്യം പരിഗണിച്ചത്.

‘കാന്തര’ എന്ന സിനിമയിലെ ‘നവരസം’ എന്ന ഗാനം ‘വരാഹരൂപം’ എന്ന പേരിൽ ഇതുവരെ പ്രദർശിപ്പിച്ചിട്ടില്ലെന്നും, ‘വരാഹരൂപം’ എന്ന ഗാനം ഒരു സ്വതന്ത്ര സൃഷ്ടിയാണ്, അതിന് നവരസവുമായി യാതൊരു ബന്ധവുമില്ലെന്നും ഹർജിക്കാർ ഹൈക്കോടതിയിൽ വാദിച്ചു. പാട്ടുകൾ തമ്മിൽ സാമ്യമുണ്ടെന്ന് തെളിയിക്കാൻ പ്രോസിക്യൂഷൻ ചില കാഴ്ചക്കാരുടെ വ്യക്തിപരമായ അഭിപ്രായങ്ങളാണ് ആശ്രയിച്ചിട്ടുള്ളതെന്നായിരുന്നു ഹർജിക്കാരുടെ വാദം. ചോദ്യം ചെയ്യലിനും മറ്റ് അന്വേഷണവുമായി സഹകരിക്കാൻ തയ്യാറാണെന്നും അതിനാൽ മുൻകൂർ ജാമ്യം അനുവദിക്കണമെന്നും ഹർജിക്കാർ ആവശ്യപ്പെട്ടു.

പകർപ്പവകാശ നിയമം സെക്ഷൻ 63 പ്രകാരം പ്രഥമദൃഷ്ട്യാ ശിക്ഷാർഹമായ കുറ്റമാണ് കേസിൽ ചെയ്തിരിക്കുന്നതെന്നും അത്തരം സാഹചര്യങ്ങളിൽ ഹർജിക്കാരെ അറസ്റ്റ് ചെയ്ത് ചോദ്യം ചെയ്യേണ്ടത് അനിവാര്യമാണെന്നും പ്രോസിക്യൂഷൻ വാദം ഉന്നയിച്ചു. രണ്ട് ഗാനങ്ങളും തമ്മിൽ സാമ്യമുണ്ടെന്ന് അന്വേഷണ ഉദ്യോഗസ്ഥൻ പ്രഥമദൃഷ്ട്യാ കണ്ടെത്തിയിട്ടുണ്ടെന്ന് കോടതി ചൂണ്ടിക്കാട്ടി. നവരസത്തിന്റെ കോപ്പിയടിച്ച പതിപ്പാണ് വരഹരരൂപം എന്ന് അന്വേഷണ ഉദ്യോഗസ്ഥൻ വിദഗ്ധരില്‍ നിന്ന് അഭിപ്രായങ്ങൾ ശേഖരിച്ച് റിപ്പോർട്ട് ചെയ്തിരുന്നു. വിശദവും നീതിയുക്തവുമായ അന്വേഷണം ഇക്കാര്യത്തിൽ തികച്ചും അനിവാര്യമായതിനാൽ, അന്വേഷണത്തിന്റെ പ്രാരംഭ ഘട്ടത്തിൽ, പ്രതികൾ നിരപരാധികളെന്ന് പറയാനാവില്ലെന്നും കോടതി ചൂണ്ടികാട്ടി. അതിനാൽ ‘കാന്താര’ സിനിമയിൽ ‘വരാഹ രൂപം’ എന്ന ഗാനം സിവിൽ കോടതി ഉത്തരവ് പുറപ്പെടുവിക്കുന്നത് വരെ പ്രദർശിപ്പിക്കരുതെന്ന് കോടതി നിർദേശിച്ചു.