പൃഥ്വിയുടെ ‘തീർപ്പ്‘ ഒടിടി റിലീസിന്: ഹോട്ട്സ്റ്റാറിലൂടെ എത്തുമെന്ന് റിപ്പോർട്ട്

പൃഥ്വിരാജ്, ഇന്ദ്രജിത്ത്, വിജയ് ബാബു എന്നിവർ പ്രധാന വേഷങ്ങളിലെത്തിയ ചിത്രമാണ് ‘തീർപ്പ്’. ‘കമ്മാരസംഭവ ‘ത്തിന് ശേഷം മുരളി ​ഗോപിയുടെ രചനയിൽ രതീഷ് അമ്പാട്ട് സംവിധാനം ചെയ്ത ചിത്രമാണിത്. വിധിതീർപ്പിലും പകതീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക് എന്ന ടാഗ്‍ലൈനോടെയാണ് ചിത്രം എത്തിയത്. സൈജു കുറുപ്പ്, ഇഷ തല്‍വാര്‍, വിജയ് ബാബു, ഹന്ന റെജി കോശി തുടങ്ങിയവരും ചിത്രത്തിലെ പ്രധാന കഥാപാത്രങ്ങളാണ്.

ആഗസ്റ്റ് 25നായിരുന്നു ‘തീർപ്പ്’ തിയേറ്ററുകളിൽ റിലീസ് ചെയ്തത്. സിനിമയ്ക്ക് സമൂഹ മാധ്യമങ്ങളിലൂടെ നല്ല പ്രതികരണം ലഭിച്ചിരുന്നതെങ്കിലും ചിത്രം തിയേറ്ററുകളിൽ വിജയം കൈവരിച്ചില്ല. ഇപ്പോളിതാ, ‘തീർപ്പ്’ ഉടൻ ഒടിടി സ്ട്രീമിങ്ങ് ആരംഭിക്കുമെന്ന റിപ്പോർട്ടുകളാണ് പുറത്ത് വരുന്നത്. ഡിസ്നി പ്ലസ് ഹോട്ട്സ്റ്റാറിലൂടെയായിരിക്കും ചിത്രമെത്തുക. ഈ മാസം 30 മുതൽ ചിത്രം സ്ട്രീമിങ്ങ് ആരംഭിക്കുമെന്നാണ് വിവരം.

Also Read: സൗബിൻ – അർജുൻ അശോകൻ കൂട്ടുകെട്ട്: ‘രോമാഞ്ചം’ തിയേറ്ററുകളിലേക്ക്

ഫ്രൈഡേ ഫിലിം ഹൗസിന്റെ ബാനറിൽ വിജയ് ബാബു ആണ് ചിത്രം നിർമ്മിച്ചത്. മുരളി ​ഗോപി, രതീഷ് അമ്പാട്ട് എന്നിവരും നിർമ്മാണത്തിൽ പങ്കാളികളാണ്. ചിത്രത്തിന്റെ സംഗീത സംവിധാനവും ഗാനരചനയും നിർവ്വഹിച്ചിരിക്കുന്നത് മുരളി ഗോപിയാണ്. മുരളി ​ഗോപി ആദ്യമായി സം​ഗീത സംവിധാനം നിർവ്വഹിക്കുന്ന ചിത്രം കൂടിയാണിത്. ​ഗോപി സുന്ദറിൻ്റേതാണ് പശ്ചാത്തല സംഗീതം.