മലപ്പുറത്തുകാരൻ മൂസയായി സുരേഷ് ​ഗോപി: ‘മേ ഹൂം മൂസ’ സെപ്റ്റംബറിലെത്തും

സുരേഷ് ​ഗോപിയെ നായകനായി ജിബു ജേക്കബ് സംവിധാനം ചെയ്യുന്ന ചിത്രമാണ് ‘മേ ഹൂം മൂസ’. പ്രഖ്യാപന സമയം മുതൽ ശ്രദ്ധനേടിയ ചിത്രത്തിൽ മലപ്പുറത്തുകാരൻ മൂസ ആയിട്ടാണ് സുരേഷ് ​ഗോപി എത്തുന്നത്. കാർഗിൽ, വാഗാ ബോർഡർ, പുഞ്ച്, ദില്ലി, ജയ്പ്പൂർ തുടങ്ങിയ പ്രദേശങ്ങളിലും പൊന്നാനി, മലപ്പുറം എന്നിവിടങ്ങളിലുമാണ് ചിത്രത്തിൻ്റെ ഷൂട്ടിം​ഗ് നടന്നത്.

ഇപ്പോളിതാ, ‘മേ ഹൂം മൂസ’യുടെ റിലീസ് തിയതി പ്രഖ്യാപിച്ചിരിക്കുകയാണ് അണിയറ പ്രവർത്തകർ. സെപ്റ്റംബർ 30നാണ് ചിത്രം റിലീസ് ചെയ്യുന്നത്. ചിത്രത്തിന്റെ പുതിയ പോസ്റ്ററും അണിയറ പ്രവർത്തകർ പുറത്തുവിട്ടിട്ടുണ്ട്. സിഗരറ്റ് പുകച്ച് മാസ് ലുക്കിലാണ് സുരേഷ് ​ഗോപി പോസ്റ്ററിൽ ഉള്ളത്. സുരേഷ് ​ഗോപി ഉൾപ്പടെയുള്ള അണിയറ പ്രവർത്തകർ പോസ്റ്റർ സമൂഹ മാധ്യമത്തിൽ പങ്കുവച്ചിട്ടുണ്ട്.

Also Read: പ്രതിഫലം വേണ്ട: ലാൽ സിംഗ് ഛദ്ദയുടെ 100 കോടി നഷ്ടം ആമിർ ഖാൻ നികത്തും

കോൺഫിഡൻ്റ് ഗ്രൂപ്പ്, തോമസ് തിരുവല്ലാ ഫിലിംസ് എന്നീ ബാനറുകളിൽ ഡോ. സി ജെ റോയ്, തോമസ് തിരുവല്ല എന്നിവരാണ് ചിത്രം നിർമ്മിക്കുന്നത്. വിശാലമായ ക്യാൻവാസിൽ വലിയ മുതൽ മുടക്കോടെ ഒരുക്കുന്ന ചിത്രം ഒരു പാൻ ഇന്ത്യൻ സിനിമയാണ്. പുനം ബജ്‍വയാണ് നായിക. അശ്വിനി റെഡ്ഡി, സൈജു കുറുപ്പ്, ജോണി ആൻ്റണി, സലിം കുമാർ, ഹരീഷ് കണാരൻ, മേജർ രവി, മിഥുൻ രമേഷ്, ശശാങ്കൻ മയ്യനാട്, ശ്രിന്ധ എന്നിവരും നിരവധി പുതുമുഖങ്ങളും ചിത്രത്തിൽ അണിനിരക്കുന്നു.