‘ഹൃദയാഘാതമല്ല ചെറിയ നെഞ്ചുവേദന മാത്രം’: വിക്രം സുഖമായിരിക്കുന്നുവെന്ന് ധ്രുവ്

നടൻ വിക്രമിന് ഹൃദയാഘാതം ഉണ്ടായെന്ന വാർത്ത നിഷേധിച്ച് മകൻ ധ്രുവ് വിക്രം. ഇൻസ്റ്റാ​ഗ്രാം സ്റ്റോറിയിലൂടെ ആയിരുന്നു ധ്രുവിന്റെ പ്രതികരണം. വിക്രമിന് നെഞ്ചിൽ നേരിയ അസ്വസ്ഥതയുണ്ടായിരുന്നു, അതിനായി ചികിത്സയിലാണെന്നും, ഹൃദയാഘാതം ഉണ്ടായിട്ടില്ലെന്നുമാണ് ധ്രുവ് പറയുന്നത്. ഇതുമായി ബന്ധപ്പെട്ട് പ്രചരിക്കുന്ന വ്യാജ വാർത്തകൾ തങ്ങൾക്ക് വേദനയുണ്ടാക്കിയെന്നും ധ്രുവ് കൂട്ടിച്ചേർത്തു.

ഇന്ന് ഉച്ചയോടെയാണ് വിക്രമിനെ ആരോ​ഗ്യപ്രശ്നങ്ങളെ തുടർന്ന് ആശുപത്രിയിൽ പ്രവേശിപ്പിച്ചത്. നെഞ്ചിൽ നേരിയ അസ്വസ്ഥത ഉണ്ടായതിനെത്തുടർന്ന് ചെന്നൈ കാവേരി ആശുപത്രിയിലാണ് പ്രവേശിപ്പിച്ചത്. വിക്രമിന്റെ ആരോഗ്യനില തൃപ്തികരമാണെന്നാണ് വിവ​രം. ഇത് സംബന്ധിച്ച് ആശുപത്രി അധികൃതർ മെഡിക്കൽ ബുള്ളറ്റിൻ പുറത്തിറക്കിയിട്ടുണ്ട്. വിക്രം ഇന്ന് തന്നെ ആശുപത്രിവിട്ടേക്കുമെന്നാണ് പ്രതീക്ഷിക്കുന്നത്.

Also Read: ഫഹദിന്റെ മലയൻകുഞ്ഞ് തിയേറ്ററിൽ തന്നെ എത്തും: റിലീസ് ജൂലൈ 22ന്

അതേസമയം, വാർത്ത പുറത്തു വന്നതോടെ ആരാധകരും സഹപ്രവർത്തകരും ഉൾപ്പടെ നിരവധിപ്പേരാണ് സമൂഹ മാധ്യമങ്ങളിലൂടെ അദ്ദേഹത്തിന് ആയുരാരോഗ്യസൗഖ്യം നേരുന്നത്. ‘ഗെറ്റ് വെൽ സൂൺ ചിയാൻ’ എന്ന ഹാഷ് ടാ​ഗ് ഇപ്പോൾ ട്വിറ്ററിൽ ട്രെന്റിം​ഗ് ആണ്.

ഇന്ന് വൈകുന്നേരം 6 മണിക്ക് ചെന്നൈയിൽ നടക്കാനിരിക്കുന്ന തന്റെ വരാനിരിക്കുന്ന ചിത്രമായ ‘പൊന്നിയിൻ സെൽവ’ന്റെ ടീസർ ലോഞ്ചിൽ അദ്ദേഹം പങ്കെടുക്കേണ്ടതായിരുന്നു.