‘ദി ബാറ്റ്മാൻ’ വീണ്ടും വരുന്നു; രണ്ടാം ഭാഗം ഒരുങ്ങുന്നതായി നിർമ്മാതാക്കൾ

ആരാധകർ കാത്തിരുന്ന വാർത്തയുമായി ഹോളിവുഡ് ചിത്രം ‘ദി ബാറ്റ്മാന്റെ’ നിർമ്മാതാക്കൾ. ചിത്രത്തിന്റെ രണ്ടാം ഭാ​ഗം ഒരുങ്ങുന്നു എന്ന വിവരമാണ് നിർമ്മാതാക്കളായ വാർണർ ബ്രോസ് പിക്ചേഴ്സ് പുറത്തുവിട്ടത്. ആദ്യഭാഗത്തിൽ നായകനായെത്തിയ റോബർട്ട് പാറ്റിൻസൺ തന്നെയാകും രണ്ടാം ഭാഗത്തിലും ബാറ്റ്മാനായെത്തുക. മാറ്റ് റീവ്സ് ആണ് രണ്ടാം ഭാഗവും സംവിധാനം ചെയ്യുന്നത്. സിനിമയുടെ കഥയോ മറ്റു വിവരങ്ങളോ പുറത്തുവിട്ടിട്ടില്ല.

200 മില്യൺ ഡോളർ ബജറ്റിൽ ഒരുങ്ങിയ ‘ദി ബാറ്റ്മാൻ’ ഈ വർഷം മാർച്ചിലാണ് റിലീസ് ചെയ്തത്. ആഗോള ബോക്സ് ഓഫീസിൽ നിന്നും 750 മില്യണിലധികം വരുമാനമാണ് ചിത്രം വാരിക്കൂട്ടിയത്. ബ്രൂസ് വെയ്ൻ എന്ന കഥാപാത്രത്തിന്റെ ചെറുപ്പ കാലവും ഗോതം സിറ്റിയുടെ രക്ഷകനായി മാറുന്നതുമാണ് ആദ്യഭാഗത്തിൽ കാണിക്കുന്നത്. സോയി ക്രാവിറ്റ്സ്, പോൾ ഡാനോ, ജെഫ്രി റൈറ്റ്, ജോൺ തുർതുറോ, പീറ്റർ സർസ്ഗാർഡ്, ആൻഡി സക്കസ്, കോളിൻ ഫാരൽ എന്നിവരാണ് ചിത്രത്തിലെ പ്രധാനകഥാപാത്രങ്ങളായെത്തിയത്.