ജന്മനായുള്ള ഹൃദ്രോഗത്താൽ ബുദ്ധിമുട്ടുന്ന കുട്ടികൾക്കായി ചികിത്സാസഹായമൊരുക്കി മഹേഷ് ബാബു

ജന്മനായുള്ള ഹൃദ്രോഗത്താൽ ബുദ്ധിമുട്ടുന്ന കുട്ടികളെ സഹായിക്കുക എന്ന മഹത്തായ സംരംഭവുമായി തെലുങ്ക് സൂപ്പർസ്റ്റാർ മഹേഷ് ബാബു. ആയിരത്തിലധികം കുട്ടികൾക്ക് ഹൃദയ ശസ്ത്രക്രിയയ്ക്ക് സൗകര്യമൊരുക്കിയ താരം ആന്ധ്രാപ്രദേശിലെയും തെലങ്കാനയിലെയും ബുരിപാലം, സിദ്ധപുരം എന്നീ ഗ്രാമങ്ങളെ ദത്തെടുത്തതായും റിപ്പോർട്ടുണ്ട്.

നിലവിൽ മഹേഷ് ബാബു ഫൗണ്ടേഷൻ കുട്ടികളുടെ മെഡിക്കൽ ആവശ്യങ്ങൾക്കായി ഏറ്റവും മികച്ച ആശുപത്രികളായ റെയിൻബോ ഹോസ്പിറ്റലുകൾ, ആന്ധ്രാ ആശുപത്രികൾ എന്നിവയുമായി ബന്ധപ്പെട്ട് പ്രവർത്തിക്കുന്നുണ്ട്. റെയിൻബോ ചിൽഡ്രൻസ് ഹാർട്ട് ഇൻസ്റ്റിറ്റ്യൂട്ടിൽ പ്യുവർ ലിറ്റിൽ ഹാർട്ട്സ് ഫൗണ്ടേഷൻ എന്ന ഫൗണ്ടേഷൻ മഹേഷ് ബാബു ആരംഭിച്ചിട്ടുണ്ട്.

ഇന്ത്യയിൽ ഓരോ വർഷവും 2,00,000-ത്തിലധികം കുട്ടികൾ ജന്മനാ ഹൃദ്രോഗത്തോടെ ജനിക്കുന്നു, അവരിൽ 1/5 പേർ ജനിച്ച് ഒരു വർഷത്തിനുള്ളിൽ ശസ്ത്രക്രിയ ആവശ്യമായി വരുന്ന ഗുരുതരമായ അവസ്ഥയിൽ ആയിരിക്കാൻ സാധ്യതയുണ്ട്. ജന്മനായുള്ള ഏറ്റവും സാധാരണമായ വൈകല്യങ്ങളിലൊന്നായ അപായ ഹൃദ്രോഗം, ജനനം മുതൽ ഹൃദയത്തിന്റെ വികാസത്തെയും പ്രവർത്തനത്തെയും ബാധിക്കുന്ന വൈകല്യങ്ങളുടെ ഒരു കൂട്ടമാണ്.

മഹേഷ് ബാബു ഫൗണ്ടേഷൻ മുഖേന ആർസിഎച്ച്ഐയിൽ ഹൃദ്രോഗ ചികിത്സ ആവശ്യമുള്ള കുട്ടികളെ പിന്തുണയ്ക്കുന്നതിൽ തനിക്ക് അതിയായ സന്തോഷമുണ്ടെന്ന് നടൻ മഹേഷ് ബാബു പറഞ്ഞു.