കുടുംബപ്രേക്ഷകർ ഏറ്റെടുത്ത ചിത്രമായിരുന്നു ദുല്‍ഖര്‍ സല്‍മാനും ഉണ്ണി മുകുന്ദനും പ്രധാനവേഷത്തിൽ വന്ന ‘വിക്രമാദിത്യന്‍’. ചിത്രത്തിൽ നമിത പ്രമോദായിരുന്നു നായിക. വലിയ വാണിജ്യവിജയം നേടിയ സിനിമ രണ്ടാം ഭാഗത്തിന്റെ കഥ ചെയ്തു കൊണ്ടിരിക്കുകയാണ് സംവിധായകന്‍ ലാല്‍ജോസ്. ക്ലബ് എഫ്.എമ്മിന് നല്‍കിയ അഭിമുഖത്തിലാണ് വിക്രമാദിത്യന്‍ രണ്ടാം ഭാഗത്തെ കുറിച്ച് ലാല്‍ജോസ് പറഞ്ഞത്.
‘വിക്രമാദിത്യന്‍ രണ്ടാം ഭാഗം ഓകെയായിട്ടിരിക്കുകയാണ്. ദുല്‍ഖറിനോട് പറഞ്ഞിട്ടില്ല. കഥ ആദ്യമധ്യാന്ത്യം സെറ്റായി. ഒരു വണ്‍ലൈന്‍ സെറ്റായി കഴിഞ്ഞാല്‍ ദുല്‍ഖറിനോട് സംസാരിക്കണം. ദുല്‍ഖര്‍ ഓകെയാണെങ്കില്‍ ചിത്രത്തിന്റെ രണ്ടാം ഭാഗം ഉണ്ടാവും. ദുല്‍ഖറുണ്ടാവും, ഉണ്ണി മുകുന്ദനുണ്ടാവും. പിന്നെ ആരൊക്കെയുണ്ടാവും എന്ന് ഇപ്പോള്‍ പറയാറായിട്ടില്ല. നമിത ഒരു ചെറിയ പോഷനിലുണ്ടാവും.
നിവിന്‍ പോളി ഗസ്റ്റ് റോളിലുണ്ടാവുമോ എന്ന് പറയാന്‍ പറ്റില്ല. അന്നത്തെ ആളുകളൊക്കെ ഇപ്പോള്‍ ഒരുപാട് വളര്‍ന്ന് പോയി. ദുല്‍ഖര്‍ തന്നെ ഇത് ആക്‌സപ്റ്റ് ചെയ്യുമോയെന്ന് എനിക്ക് അറിയില്ല. കാരണം അന്നത്തെ പോലെ ഈക്വല്‍ ഇമ്പോര്‍ട്ടന്റ് ആയിട്ടുള്ള റോളില്‍ ഉണ്ണിയുണ്ട്. എങ്ങനെയായിരിക്കും ദുല്‍ഖര്‍ ഈ സിനിമയെ സമീപിക്കുക എന്നറിയില്ല. മാത്രമല്ല ഇത്തവണ ഒരു സ്റ്റാറും കൂടി പടത്തിലുണ്ടാവും. അത് പറയാറായിട്ടില്ല. ആയാളോടും പറഞ്ഞിട്ടില്ല. ഒരാളെ മനസില്‍ കണ്ടുവെച്ചിട്ടുണ്ട്. ദുല്‍ഖറിന്റെ ക്ലീന്‍ ചീറ്റ് കിട്ടിയാലേ മുന്നോട്ട് പോകാന്‍ പറ്റൂ’- അദ്ദേഹം പറഞ്ഞു.
Post Your Comments