മലയാളത്തിലെ എക്കാലത്തെയും ഹിറ്റ് ചിത്രങ്ങളില്‍ ഒന്നായ ‘ദൃശ്യം’എന്ന ചിത്രത്തിന്റെ രണ്ടാം ഭാഗവും പ്രേക്ഷകര്‍ ഏറ്റെടുത്തു. മൂന്നാം ഭാഗവും എത്തുമെന്നുള്ള സൂചനകള്‍ നിര്‍മ്മാതാവ് ആന്റണി പെരുമ്പാവൂര്‍ നേരത്തെ പങ്കുവെച്ചിരുന്നെങ്കിലും അടുത്ത ഭാഗം വരുമോ എന്ന് അറിയില്ല എന്നാണ് സംവിധായകന്‍ ജീത്തു ജോസഫ് പറയുന്നത്. ഗൃഹലക്ഷ്മിക്ക് നല്‍കിയ അഭിമുഖത്തിലാണ് സംവിധായകന്‍ ഇത് പറഞ്ഞത്.
ജീത്തു ജോസഫിന്റെ വാക്കുകൾ :
‘അടുത്ത ഭാഗം വരുമോ എന്നറിയില്ല. തെറ്റില്ലാത്ത ഒരു കഥ വന്നാല്‍ ചെയ്യുമെന്ന് മാത്രം സത്യത്തില്‍ ദൃശ്യത്തിന്റെ രണ്ടാം ഭാഗം തന്നെ വരുന്നത് ആന്റണി പെരുമ്പാവൂരിന്റെ നിര്‍ബന്ധത്താലാണ്. ആദ്യത്തെ ദൃശ്യം പുറത്തിറങ്ങി കുറച്ചായപ്പോള്‍ തന്നെ നാട്ടിലുള്ളവരെല്ലാം അതിന്റെ രണ്ടാം ഭാഗത്തിനുള്ള കഥയുമായി പുറത്ത് വരാന്‍ തുടങ്ങിയിരുന്നു.
ബോംബെയില്‍ ഒരു ഹിന്ദിക്കാരന്‍ വരെ രണ്ടാം ഭാഗത്തിനുള്ള കഥയൊരുക്കി. ഇതൊക്കെ കണ്ടപ്പോഴാണ് പലരും ആന്റണി പെരുമ്പാവൂരിനോട് ചോദിക്കാന്‍ തുടങ്ങിയത്. അങ്ങനെ ആന്റണി തന്നെ വിളിച്ച് ‘നാട്ടില്‍ എല്ലാവരും ദൃശ്യത്തിന്റെ രണ്ടാം ഭാഗം ഉണ്ടാക്കുന്നു. ജീത്തു മാത്രമെന്താ അതേക്കുറിച്ച് ആലോചിക്കാത്തത്” എന്ന് ചോദിച്ചു.
അപ്പോള്‍ മാത്രമാണ് ഞാൻ ചിന്തിച്ചു തുടങ്ങിയത്. ആദ്യത്തെ ദൃശ്യത്തെ കുറിച്ച് ഞാൻ ആലോചിക്കുന്നത് രണ്ടായിരത്തില്‍ ആയിരുന്നു. അന്ന് ഞാൻ സിനിമയില്‍ വന്നിട്ടില്ല. പിന്നെയൊരു പത്തു വര്‍ഷമെടുത്തു അതൊരു കഥയായി രൂപപ്പെടാന്‍. അതു പേലെയായിരുന്നു രണ്ടാം ഭാഗവും.’
Post Your Comments