കൊച്ചി : മരക്കാര്‍ സിനിമയുടെ റിലീസ് വിഷയത്തില്‍ ആന്റണി പെരുമ്പാവൂരിനെ പിന്താങ്ങി പ്രിയദര്‍ശന്‍. ഒരിക്കലും കൈവിടാന്‍ താനും മോഹന്‍ലാലും ഒരിക്കലും ഒരുക്കമല്ലെന്ന് പറഞ്ഞ അദ്ദേഹം ഒന്നുമില്ലായ്മയില്‍ നിന്ന് ഉയര്‍ന്നുവന്നയാളാണ് ആന്റണിയെന്നും, അതുകൊണ്ട് അദ്ദേഹത്തെ പഴയ അരക്ഷിതാവസ്ഥയിലേക്ക് തള്ളിവിടാന്‍ തനിക്ക് സാധിക്കില്ലെന്നും മനോരമയുമായുള്ള അഭിമുഖത്തില്‍ പറഞ്ഞു.
പ്രിയദര്‍ശന്റെ വാക്കുകള്‍:
‘ആന്റണി ഒന്നുമില്ലായ്മയില്‍ നിന്നാണ് ഇവിടെ എത്തിയത്. നന്നായി കഷ്ടപ്പെട്ടാണ് ഇതെല്ലാമുണ്ടാക്കിയത്. ‘മരക്കാര്‍’ എടുക്കുമ്പോള്‍ ആന്റണി പണയം വച്ചതു സ്വന്തം ജീവിതമാണ്. എന്നെയും ലാലിനെയും വിശ്വസിച്ചാണതു ചെയ്തത്. ഞാനും മോഹന്‍ലാലും ഒരു പൈസ പോലും ഈ സിനിമയ്ക്കു പ്രതിഫലം വാങ്ങിയിട്ടില്ല. ലാഭം കിട്ടുമ്പോള്‍ എടുക്കാമെന്നാണു പറഞ്ഞത്.
രണ്ടു വര്‍ഷമായി പലിശയും കൂട്ടുപലിശയും നല്‍കി ഒരക്ഷരം പറയാതെയിരുന്ന ആ മനുഷ്യനെ തിരിച്ചു പഴയ ജീവിതത്തിലേക്കു തള്ളിയിടാന്‍ ‘പടം തിയറ്ററില്‍ മതി’ എന്ന എന്റെയോ മോഹന്‍ലാലിന്റെയോ ഒരു വാക്കു മതി. ഞങ്ങളതു ചെയ്യില്ല. പഴയ അവസ്ഥയിലേക്ക് ആന്റണിയെ തള്ളിവിട്ടൊരു ആഘോഷം എനിക്കും ലാലിനും വേണ്ട. ഇതു വലിയ സ്‌ക്രീനില്‍ കാണാന്‍ പറ്റാത്തതില്‍ എനിക്കും ആന്റണിക്കും ലാലിനുമുണ്ടായതു പോലുള്ള വേദനയൊന്നും മറ്റാര്‍ക്കുമുണ്ടാകില്ല’.
Post Your Comments