തെന്നിന്ത്യയിലും ബോളിവുഡിലും ഒരേ പോലെ തിളങ്ങുന്ന നടിയാണ് തപ്‌സി പന്നു. വ്യത്യസ്ത കഥാപാത്രങ്ങളാണ് തപ്‌സി ഇപ്പോൾ തിരഞ്ഞെടുക്കുന്നത്. അതോടൊപ്പം തന്റെ നിലപാടുകൾ തുറന്നു പറയാനും ഒരു മടിയും കാണിക്കാത്ത ആളാണ് തപ്‌സി. തന്റെ വിശേഷങ്ങൾ എല്ലാം സോഷ്യൽ മീഡിയയിലൂടെ പങ്കുവെയ്ക്കാറുള്ള താരം ഇപ്പോൾ പങ്കുവെച്ച കുറിപ്പാണ് ചർച്ചയാകുന്നത്.
തന്റെ അഭിനയത്തെ വ്യക്തിപരമായി ആക്ഷേപിച്ചതിനെ തുടർന്നാണ് താരം പ്രതികരണവുമായി രംഗത്തെത്തിയത്. സിനിമ നിരൂപണം സ്വാഭാവികമാണെന്നും എന്നാല്‍ വ്യക്തിപരം ആയിരിക്കരുത് എന്നും തപ്‌സി പറയുന്നു. തുടർന്ന് ഇതിനെ പറ്റി നടി ഇ ടൈംസിന് നല്‍കിയ പ്രത്യേക അഭിമുഖത്തിലും സംസാരിക്കുകയുണ്ടായി.
തപ്‌സി പന്നുവിന്റെ വാക്കുകൾ:
‘വളരെ വ്യക്തിപരമായിട്ടാണ് ആ നിരൂപണങ്ങള്‍ ഉണ്ടായിരുന്നത്. എന്നാല്‍ ഞാനത് വ്യക്തിപരമായി എടുത്തിട്ടില്ല. എന്നെ വിമര്‍ശിക്കുന്നവര്‍ക്ക് എന്റെ സിനിമാ ജീവിതത്തെ കുറിച്ച് വ്യക്തമായ ധാരണ ഉണ്ടായിരിക്കണം. എന്റെ തുടക്കകാലത്ത് ലഭിച്ച ചില അവലോകനങ്ങള്‍ എന്നെ സിനിമ വിട്ട് പോകാന്‍ തന്നെ പ്രേരിപ്പിയ്ക്കും വിധമായിരുന്നു.ഞാന്‍ എപ്പോഴും പറയാറുള്ളത് പോലെ, കൃത്യമായ അഭിനയ പരിശീലനം ലഭിച്ചിട്ടോ പാരമ്പര്യം ഉണ്ടായിട്ടോ സിനിമയില്‍ എത്തിയ ആളല്ല ഞാന്‍. അതുപോലെ ഞാന്‍ ഒരിക്കലും ഒരു മികച്ച അഭിനേത്രിയാണ് എന്ന് അവകാശപ്പെടുന്നും ഇല്ല. ഒരു സിനിമ ചെയ്യുമ്പോള്‍ ആ സിനിമയ്ക്ക് ഞാനാണ് ഏറ്റവും മികച്ച ചോയിസ് എന്നും പറയുന്നില്ല. സിനിമയില്‍ എത്തി, എന്റെ തെറ്റുകുറ്റങ്ങളോടെ തന്നെയാണ് പലതും പഠിച്ചത്.
എന്റെ സിനിമയെ കുറിച്ച് നിങ്ങള്‍ നിരൂപണം എഴുതുന്നത് തെറ്റല്ല. സിനിമയെ കുറിച്ച് നിങ്ങള്‍ക്ക് അഭിപ്രായം പറയാം. അതേ സമയം ഞാന്‍ എന്ന വ്യക്തിയെ കേന്ദ്രീകരിച്ച് പറയുമ്പോള്‍, അതും ഒരു ദേശീയ മാധ്യമത്തിലൂടെ പറയുമ്പോള്‍ അത് തീര്‍ത്തും വ്യക്തിപരം തന്നെയാണ്. അല്ലെങ്കില്‍ ആ നിരൂപണം അയാള്‍ക്ക് സ്വന്തം ബ്ലോഗിലൂടെ പറയാമായിരുന്നു.നിങ്ങള്‍ക്ക് വേണമെങ്കില്‍ എന്റെ പെര്‍ഫോമന്‍സിനെ കുറിച്ച് വിമര്‍ശിക്കാം. അങ്ങനെ വിമര്‍ശിക്കപ്പെട്ട ചില പെര്‍ഫോമന്‍സില്‍ നിന്ന് ഒരു കരിയര്‍ ഉണ്ടാക്കി എടുത്ത ആളാണ് ഞാന്‍. എന്നാല്‍ തപ്‌സി ഓരോ ചിത്രത്തിലും വസ്ത്രം മാറുന്നതേയുള്ളൂ, വേറെ മാറ്റമൊന്നും ഇല്ല എന്ന് പറഞ്ഞത് വ്യക്തിപരമായ കുറ്റപ്പെടുത്തലാണ്. അതാണ് എന്നെ ആ സോഷ്യല്‍ മീഡിയ പോസ്റ്റ് ഇടാന്‍ പ്രേരിപ്പിച്ചത്.
എന്നെ കുറിച്ച് സംസാരിക്കാന്‍ എനിക്ക് മാത്രമേ കഴിയൂ എന്ന് തോന്നി. ഓരോ സിനിമ ചെയ്തു കഴിയുമ്പോഴും ഉള്ള വിമര്‍ശനങ്ങളില്‍ നിന്ന് പാഠങ്ങള്‍ പഠിച്ചാണ് ഞാന്‍ മുന്നോട്ട് പോകുന്നത്. ആ ഞാന്‍ എല്ലാ സിനിമകളിലും ഒരുപോലെയാണെന്നും തുണി മാറുന്നത് മാത്രമേ ഉള്ളൂ എന്നും പറഞ്ഞത് വേദനിപ്പിച്ചു’- തപ്‌സി പറഞ്ഞു
Post Your Comments