ഒരു കാര്യം ലക്ഷ്യം വച്ചാല്‍ പിന്നെ എന്നെ തടയാന്‍ ഒന്നിനും കഴിയില്ല; ഷാജി കൈലാസ്

മലയാളി പ്രേക്ഷകർക്ക് മികച്ച നിരവധി ചിത്രങ്ങൾ സമ്മാനിച്ച സംവിധായകനാണ് ഷാജി കൈലാസ്. 1989 ൽ പുറത്തിറങ്ങിയ ന്യൂസ് എന്ന ചിത്രത്തിലൂടെയാണ് ഷാജി കൈലാസ് സംവിധായകനായി അരങ്ങേറ്റം കുറിച്ചത്. തലസ്ഥാനം , ഏകലവ്യൻ, മാഫിയ, കമ്മീഷണർ എന്നിങ്ങനെ നിരവധി ഹിറ്റ് ചിത്രങ്ങളാണ് അദ്ദേഹത്തിന്റേതായി പിൻകാലത്ത് പിറന്നത്.

സൂപ്പർ താരങ്ങളായ മമ്മൂട്ടി, മോഹൻലാൽ, സുരേഷ് ഗോപി തുടങ്ങിയവരുടെ ഹിറ്റ് ചിത്രങ്ങളിൽ ഷാജി കൈലാസ് സിനിമകളും ഉണ്ടായിരുന്നു. വൻ വിജയങ്ങൾ മാത്രമല്ല പരാജയങ്ങളും സംവിധായകനെ തേടി എത്തിയിട്ടുണ്ട്. മമ്മൂട്ടിയെ നായകനാക്കി സംവിധാനം ചെയ്ത ചിത്രം ദ്രോണ വൻ പരാജയമായതോടെ ഷാജി കൈലാസ് സിനിമയിൽ നിന്ന് അല്പം വിട്ടു നില്ക്കാൻ തുടങ്ങി. പിന്നീട് സിനിമകൾ ചെയ്‌തെങ്കിലും അധികം ശ്രദ്ധിക്കപ്പെട്ടിരുന്നില്ല. എന്നാൽ ഇപ്പോൾ ഗംഭീര തിരിച്ചു വരവ് നടത്താനൊരുങ്ങുകയാണ് ഷാജി കൈലാസ്. പൃഥ്വിരാജിനെ നായകനാക്കി കടുവ എന്ന ചിത്രവുമായാണ് ഷാജി എത്തുന്നത്.

കഴിഞ്ഞ ദിവസമാണ് ചിത്രത്തിന്റെ ഷൂട്ടിങ് കോട്ടയത്തെ മുണ്ടക്കയത്ത് ആരഭിച്ചത്. ചിത്രം ഒരു രു മാസ് ആക്ഷന്‍ എന്റര്‍ടൈന്‍മെന്റ് തന്നെയായിരിക്കുമെന്നാണ് റിപ്പോർട്ട്. ലൊക്കേഷനില്‍ നിന്നുള്ള പൃഥ്വിരാജിന്റെ ചില ചിത്രങ്ങള്‍ സോഷ്യല്‍ മീഡിയയില്‍ വൈറലാണ്. ചിത്രീകരണം ആരംഭിച്ചതിന് ശേഷമുള്ള പൃഥ്വിരാജിന്റെ ആദ്യ സ്‌നാപ് പുറത്ത് വിട്ടുകൊണ്ട് ഷാജി കുറിച്ച വാക്കുകളാണ് ഇപ്പോൾ ശ്രദ്ധേയമാകുന്നത്.

”മനസ്സില്‍ ഒരു കാര്യം ലക്ഷ്യം വച്ചാല്‍ പിന്നെ എന്നെ തടയാന്‍ ഒന്നിനും കഴിയില്ല” എന്ന് പറഞ്ഞുകൊണ്ടാണ് കുറവാച്ചന്റെ ആദ്യ ഫോട്ടോ സംവിധായകന്‍ പുറത്ത് വിട്ടത്. ചിത്രീകരണം പുരോഗമിച്ചുകൊണ്ടിരിയ്ക്കുകയാണെന്നും സംവിധായകന്‍ ഫേസ്ബുക്കിലൂടെ അറിയിച്ചു.

https://www.facebook.com/ShajiKailasOfficial/posts/304349681051139

ഇത് രണ്ടാം തവണയാണ് ഷാജി കൈലാസ് പൃഥ്വിരാജിനെ നായകനാക്കി സിനിമ സംവിധാനം ചെയ്തത്. നേരത്തെ ചെയ്ത സിംഹാസനം എന്ന ചിത്രത്തിന് തിയേറ്ററില്‍ വലിയ വിജയം നേടാന്‍ കഴിഞ്ഞിരുന്നില്ല. എന്നാല്‍ കടുവയില്‍ പൃഥ്വിയ്ക്കും ആരാധകര്‍ക്കും വലിയ പ്രതീക്ഷകളുണ്ട്.

ബോളിവുഡ് താരം വിവേക് ഒബ്റോയ് ആണ് ചിത്രത്തിലെ വില്ലന്‍ വേഷത്തില്‍ എത്തുന്നത്. നായികയായി സംയുക്ത മേനോനും എത്തുന്നു. ഇവരെ കൂടാതെ അജു വര്‍ഗ്ഗീസ്, സിദ്ധിഖ്, ദിലീഷ് പോത്തന്‍, രാഹുല്‍ മാധവന്‍ എന്നിവരും ചിത്രത്തില്‍ കഥാപാത്രങ്ങളായി എത്തുന്നുണ്ട്. മാജിക് ഫ്രെയിമിന്റെ ബാനറില്‍ ലിസ്റ്റിന്‍ സ്റ്റീഫനും പൃഥ്വിരാജ് സുകുമാരന്‍ പ്രൊഡക്ഷന്‍സിന്റെ ബാനറില്‍ സുപ്രിയ മേനോനും ചേര്‍ന്നാണ് കടുവ നിര്‍മിയ്ക്കുന്നത്. ജാക്‌സ് ബിജോ സംഗീത സംവിധാനം നിര്‍വ്വഹിയ്ക്കുന്ന ചിത്രത്തിന് വേണ്ടി ക്യാമറ ചലിപ്പിയ്ക്കുന്നത് അഭിനന്ദന്‍ രാമാനുജം ആണ്.