കുഞ്ചാക്കോ ബോബന്റെ ഇസക്കുട്ടനെ ചേർത്ത് പിടിച്ച് നയൻ‌താര; വൈറലായി ചിത്രം

കുഞ്ചാക്കോ ബോബന്റെയും പ്രിയയുടെയും പ്രിയങ്കരനായ പുത്രനാണ് ഇസഹാഖ് എന്ന ഇസക്കുട്ടൻ. കുഞ്ചാക്കോ ബോബനൊപ്പമുള്ള ഇസഹാഖിന്റെ ചിത്രം ഓൺലൈനിൽ തരംഗമാകാറുണ്ട്. ഇപ്പോഴിതാ ലേഡി സൂപ്പർസ്റ്റാർ നയൻതാരയ്‍ക്കൊപ്പമുള്ള ഇസക്കുട്ടന്റെ ചിത്രമാണ് ഇപ്പോൾ ആരാധകർ ഏറ്റെടുത്തിരിക്കുന്നത്. കുഞ്ചാക്കോ ബോബൻ തന്നെയാണ് ഫോട്ടോ ഷെയർ ചെയ്‍തത്. നിഴലിന്റെ ലൊക്കേഷനിലേക്ക് പ്രിയയും മോനും എത്തിയപ്പോഴായിരുന്നു ചാക്കോച്ചനും നയൻസും ഇവരുടെ കൂടെ പോസ് ചെയ്തത്. താരങ്ങളും ആരാധകരുമൊക്കെയായി നിരവധി പേരാണ് ചിത്രത്തിന് കീഴിൽ കമന്റുകളുമായെത്തിയിട്ടുള്ളത്

ലവ് ആക്ഷൻ ഡ്രാമയ്ക്ക് ശേഷം കുഞ്ചാക്കോ ബോബൻ നായകനാകുന്ന നിഴൽ എന്ന സിനിമയിലാണ് ഇപ്പോൾ നയൻതാര പ്രധാന കഥാപാത്രമായി എത്തുന്നത്. രാജ്യാന്തര പുരസ്‍കാരങ്ങളും സംസ്ഥാന സർക്കാറിന്റെ അം​ഗീകാരങ്ങളും നേടിയിട്ടുള്ള എഡിറ്റർ അപ്പു ഭട്ടതിരി ആദ്യമായി സംവിധാനം ചെയ്യുന്ന ചിത്രത്തിലാണ് കുഞ്ചാക്കോ ബോബനും നയൻതാരയും ഒന്നിക്കുന്നത്.

എസ് സഞ്‍ജീവ് ആണ് ചിത്രത്തിന്റെ തിരക്കഥയെഴുതുന്നത്. ദീപക് ഡി മേനോൻ ഛായാഗ്രാഹണം നിർവഹിക്കുന്നു. സംവിധായകനായ അപ്പു എൻ ഭട്ടതിരിക്കൊപ്പം അരുൺലാൽ എസ് പിയും ചേർന്നാണ് എഡിറ്റിംഗ് നിർവ്വഹിക്കുന്നത്. സ്റ്റെഫി സേവ്യർ ആണ് ചിത്രത്തിന്റെ വസ്‍ത്രാലങ്കാരം നിർവഹിക്കുന്നത്.

ആന്റോ ജോസഫ് ഫിലിം കമ്പനിക്കൊപ്പം അഭിജിത് എം പിള്ള, ബാദുഷ, ഫെല്ലിനി ടി പി, ഗണേഷ് ജോസ് എന്നിവർ ചേർന്നാണ് ചിത്രം നിർമിക്കുന്നത്. സൂരജ് എസ് കുറുപ്പ് ആണ് സംഗീത സംവിധായകൻ. ഉമേഷ് രാധാകൃഷ്‍ണൻ ആണ് ചീഫ് അസോസിയേറ്റ് ഡയറക്ടർ.