സിനിമ മാത്രമല്ല മുരളി അഭിനയിച്ച എയർ ഡക്കാന്റെ പരസ്യവും ഹിറ്റാണ്

സൂര്യ നായകനായെത്തിയ എയർ ഡക്കാന്റെ കഥ പറയുന്ന തമിഴ് സിനിമ സൂരൈ പോട്ര് വൻ ഹിറ്റായതോടെ പതിനഞ്ചു വർഷങ്ങൾക്ക് മുൻപ് ഇറങ്ങിയ ഒരു പരസ്യവും ഇപ്പോൾ ഹിറ്റായിക്കൊണ്ടിരിക്കുകയാണ്. ഗൂഗിൾ അടക്കമുള്ള വൻകിടക്കാരുടെ പരസ്യം സംവിധാനം ചെയ്ത മനോജ് പിള്ള സംവിധാനം ചെയ്ത് എയർ ഡക്കാന്റെ പരസ്യം അന്നും ഹിറ്റായിരുന്നു. ഈ പരസ്യത്തിൽ അഭിനയിച്ചത് മലയാളികളുടെ പ്രിയ നടൻ മുരളി ആണ് എന്നുള്ളതാണ് മറ്റൊരു പ്രത്യേകത.

ഡൽഹിയിൽ ജോലികിട്ടിപ്പോയ മകൻ ഗ്രാമത്തിലെ ആശാരിയായ അച്ഛനു എയർഡക്കാൻ ടിക്കറ്റ് അയച്ചു കൊടുക്കുന്നതാണ് പരസ്യ ചിത്രത്തിന്റെ പ്രമേയം. കുട്ടിക്കാലത്തനു മകന് ഉണ്ടാക്കിക്കൊടുത്ത മരത്തിന്റെ കളിപ്പാട്ട വിമാനവുമായാണ് അച്ഛൻ ഡൽഹിക്കു പറക്കുന്നത്.

പരസ്യത്തിൽ അഭിനയിക്കാൻ ഏറെ അന്വേഷിച്ച ശേഷമാണു മുരളിയെ മനോജ് പിള്ള കണ്ടെത്തുന്നത്. ആദ്യം പരസ്യത്തിൽ അഭനയിക്കില്ലന്ന് ഉറപ്പിച്ചു പറഞ്ഞ മുരളി കഥ കേട്ടതോടെ സമ്മതിക്കുകയായിരുന്നു. മനോജ് പിള്ളയുടെ തിങ്ക് പോട്ട് എന്ന ഏജൻസിയാണു പരസ്യം നിർമിച്ചത്. കഥ എഴുതിയതു ലിയൊ ബനറ്റ് എന്ന പരസ്യ ഏജൻസിയുടെ ക്രിയേറ്റീവ് തലവനായ മാവിലേക്കരക്കാരൻ തോമസ് സേവ്യർ.