നടി ഷംന കാസിമിനെ ഭീഷണിപ്പെടുത്തി പണം തട്ടാന്‍ ശ്രമിച്ച കേസില്‍ കൂടുതല്‍ വിവരങ്ങള്‍ പുറത്ത്. തട്ടിപ്പിനായി ഷംന കാസിമിനെ സമീപിച്ച സംഘം പ്രമുഖ താരങ്ങളുമായും ബന്ധപ്പെട്ടിരുന്നു.
രണ്ടുകോടിയും ആഡംബരക്കാറുമാണ് ഒരു പ്രമുഖ ഹാസ്യതാരത്തിന് ഈ സംഘം വാഗ്ദാനം ചെയ്തത്. പഴയകാല സംവിധായകന് പുതിയ സിനിമ എടുക്കാനായി അഞ്ചുകോടി വാഗ്ദാനം ചെയ്തുവെന്നും വിവരം. കൂടാതെ മലയാളത്തിലെ തിരക്കുള്ള നായികനടിയെ വിളിച്ച്‌ സ്വര്‍ണക്കടത്തിന് സഹായം തേടി. കേരളത്തിന് പുറത്ത് താമസിക്കുന്ന മുതിര്‍ന്ന നടനെ സമീപിക്കാനും ശ്രമിച്ചിരുന്നുവെന്നും വിവരം. എല്ലാവരും ഒഴിഞ്ഞതിനാല്‍ തട്ടിപ്പ് നടന്നില്ല. തട്ടിപ്പ് സംഘത്തെക്കുറിച്ച്‌ കൂടുതല്‍ അന്വേഷണങ്ങള്‍ നടത്താനുള്ള ഒരുക്കത്തിലാണ് പൊലീസ്.
ഷംന കാസിമിനെ തട്ടിക്കൊണ്ടുപോകാന്‍, പിടിയിലായ പ്രതികള്‍ പദ്ധതിയിട്ടിരുന്നതായി ഐജി വിജയ് സാക്കറെ വ്യക്തമാക്കി. ഷംന പരാതി നല്‍കിയതിനാല്‍ പ്രതികള്‍ക്ക് പദ്ധതി നടപ്പിലാക്കാനായില്ല. കേസില്‍ ഷംനയുടെ മൊഴിയെടുക്കല്‍ പൂര്‍ത്തിയായി. വീഡിയോ കോണ്‍ഫറന്‍സ് വഴിയാണ് വിവരങ്ങള്‍ പൊലീസ് ചോദിച്ചറിഞ്ഞത്. ഹൈദരാബാദില്‍ നിന്ന് കഴിഞ്ഞ ദിവസം കൊച്ചി മരടിലെ വീട്ടില്‍ എത്തിയ താരം ഹോം ക്വാറന്റൈനില്‍ കഴിയുകയാണ്
Post Your Comments