ബിഗ് ബോസ് രണ്ടാം സീസണ്‍ രണ്ടാം വാരം പിന്നിടുമ്പോള്‍ വീട്ടിലുള്ളവരില്‍ ആര്‍ക്കാണ് ഏറ്റവുമധികം പ്രേക്ഷക പിന്തുണയെന്നത് കുഴപ്പിക്കുന്ന ചോദ്യമാണ്. എന്നിരുന്നാലും ഡോ. രജിത് കുമാര്‍ ഇതിനോടകം തന്നെ ഏറെ ആരാധകരെ നേടിയെടുത്തിരിക്കുകയാണ്. കാരണം സോഷ്യല്‍ മീഡിയയില്‍ ശക്തമായ വാദപ്രതിവാദങ്ങള്‍ നടക്കുന്നത് രജിത്തിന്റെ പേരിലാണ്. ബിഗ് ബോസ് കാണുന്നത് തന്നെ രജിത് ഉള്ളതുകൊണ്ടാണെന്നാണ് പലരും പറയുന്നത്.
രജിത് സാര്‍, രജിത്തണ്ണന്‍, അണ്ണന്‍ എന്നിങ്ങനെയുള്ള പേരുകളാണ് രജിത്തിന് ആരാധകര്‍ നല്‍കിയിട്ടുള്ളത്. വീട്ടിലെ ബാക്കി 16 മല്‍സരാര്‍ത്ഥികളും തനിക്കെതിരാണെന്ന് രജിത് പറയുമ്പോള്‍ പുറത്ത് ലക്ഷക്കണക്കിന് ആളുകളാണ് രജിത്തിനുള്ളതെന്നാണ് ഫാന്‍സിന്റെ വാക്കുകള്‍. ഉപദേശവും സിദ്ധാന്തവുമൊക്കെയായി വീട്ടിലുള്ള മല്‍സരാര്‍ത്ഥികളെ വെറുപ്പിക്കുന്നുണ്ടെങ്കിലും രജിത് ഉള്ളതാണ് ഗെയിമിലെ ഏക അനക്കമെന്നാണ് പ്രേക്ഷകരുടെ അഭിപ്രായം.
ഇങ്ങനെയിരിക്കെയാണ് ആദ്യ എലിമിനേഷനെത്തിയത്. രജിത്തിനോടുള്ള ഇഷ്ടം പ്രകടിപ്പിക്കാന്‍ ആരാധകര്‍ക്ക് കിട്ടിയ ആദ്യ അവസരം. വോട്ട് ചെയ്യേണ്ടതെങ്ങനെ എന്ന് പറഞ്ഞുകൊടുക്കുന്ന ചെറിയ വിഡിയോകളടക്കം ഈ സമയം പ്രചരിച്ചിരുന്നു. ഒടുവില്‍ വന്ന വിധിയെഴുത്തും തെറ്റിയില്ല. രജിത് പുറത്തുപോകും!, പക്ഷെ ഇപ്പോഴല്ല. വെള്ള മുണ്ടും ഷര്‍ട്ടുമൊക്കെ ധരിച്ച് പുറത്തേക്കിറങ്ങിയാല്‍ നേരെ കോളേജിലേക്ക് പോയേക്കാം എന്നും പറഞ്ഞിരുന്ന രജിത് ഒടുവില്‍ രാജകീയമായി തന്നെ ഹൗസില്‍ തുടരും.
നിങ്ങള്‍ ഒരു മുത്താണ് എന്നാണ് മോഹന്‍ലാല്‍ രജിത്തിനോട് എലിമിനേഷന്‍ റിസള്‍ട്ട് അറിയിച്ചപ്പോള്‍ പറഞ്ഞത്. രജിത് ആരാധകരെക്കുറിച്ച് തൊട്ടും തൊടാതെയും ഒരു സൂചന നല്‍കുകയായിരുന്നു മോഹന്‍ലാല്‍. ആദ്യ എലിമിനേഷന്‍ കഴിയുമ്പോള്‍ പൂര്‍വ്വാധികം ശക്തിയോടെ തിരിച്ചുവരുമെന്ന പ്രിയ മല്‍സരാര്‍ത്ഥിയുടെ വാക്കുകളിലാണ് രജിത് ഫാന്‍സിന്റെ പ്രതീക്ഷ. ഒപ്പം വേറെ ലെവല്‍ കളി കാണാന്‍ ഒരുങ്ങിയിരിക്കുകയാണ് ഇവര്‍.
Post Your Comments