മിനിസ്‌ക്രീന്‍ പ്രേക്ഷകര്‍ ഒന്നടങ്കം കാത്തിരുന്ന മുഹൂര്‍ത്തങ്ങളിലൊന്നായിരുന്നു ഉപ്പും മുളകിലെ ലച്ചുവിന്റെ കല്യാണം. ക്രിസ്മസ് ദിനത്തിലായിരുന്നു ഈ എപ്പിസോഡ് സംപ്രേഷണം ചെയ്തത്. യഥാര്‍ത്ഥ ജീവിതത്തിലെ ഒരു വിവാഹം എങ്ങനെയാണോ അതേ പോലെയുള്ള കാര്യങ്ങളായിരുന്നു ഉപ്പും മുളകിലും അരങ്ങേറിയിരുന്നത്. നേവി ഓഫീസറായ സിദ്ധാര്‍ത്ഥാണ് ലച്ചുവിനെ വിവാഹം ചെയ്തത്. വിവിധ പരിപാടികളിലൂടെയായി പ്രേക്ഷകര്‍ക്ക് സുപരിചിതനായി മാറിയ ഡെയ്ന്‍ ഡേവിസായിരുന്നു സിദ്ധാര്‍ത്ഥിനെ അവതരിപ്പിച്ചത്.
ലച്ചുവിനോട് വികാരധീനനായി സംസാരിക്കുന്ന ബാലുവിനെ കണ്ടപ്പോള്‍ പ്രേക്ഷകരുടെ ഹൃദയവും സങ്കടത്താല്‍ വിങ്ങിയിരുന്നു. ആ രംഗത്ത് താനും ശരിക്ക് കരഞ്ഞുപോയെന്നായിരുന്നു ബാലു പറഞ്ഞത്. ഇപ്പോഴിതാ വിവാഹത്തിനിടയിലെ അനുഭവം പങ്കുവെച്ച് എത്തിയിരിക്കുകയാണ് നീലു.
നിഷ സാരംഗാണ് നീലുവിനെ അവതരിപ്പിക്കുന്നത്. ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തിനിടയിലായിരുന്നു താരം വിവാഹ വിശേഷങ്ങളെക്കുറിച്ച് തുറന്നുപറഞ്ഞത്. ലച്ചുവിന്റെ വിവാഹത്തില്‍ താനും ഇമോഷണലായിരുന്നുവെന്ന് താരം പറയുന്നു.
ലച്ചു യാത്ര പറഞ്ഞ കാറില്‍ കയറുന്നതിനിടയില്‍ കരഞ്ഞിരുന്നു. ചിരിച്ചുകൊണ്ടായിരിക്കണം ഭര്‍ത്താവിനൊപ്പം പോവേണ്ടതെന്നായിരുന്നു നീലു ലച്ചുവിനോട് പറഞ്ഞത്. ഇതേ കാര്യം താന്‍ സ്വന്തം മകളോട് പറഞ്ഞിരുന്നതായി താരം പറയുന്നു. മൂത്ത മകളുടെ വിവാഹദിനത്തില്‍ ഇത് പോലൊരു സംഭവം നടന്നിരുന്നു. അവള്‍ സങ്കടപ്പെട്ടപ്പോള്‍ ഇതായിരുന്നു താന്‍ പറഞ്ഞത്. ലച്ചുവിനോടും അതേ കാര്യമാണ് പറഞ്ഞത്. ഹൃദയത്തില്‍ നിന്നും വന്ന വാക്കുകളാണ് അത്.
വിവാഹത്തിന് പിന്നാലെയായി സിദ്ധുവിനോടൊപ്പം ഹണിമൂണാഘോഷത്തിനായി ഡല്‍ഹിയിലേക്ക് പോയിരിക്കുകയാണ് ലച്ചു. സിദ്ധുവും ലച്ചുവും തിരിച്ചുവരുന്നതിനായി കാത്തിരിക്കുകയാണ് നീലുവും ബാലുവും.
Post Your Comments