തിരക്കഥാകൃത്ത് ബെന്നി പി നായരമ്പലത്തിനെ ആര്‍ക്കും പരിചയപ്പെടുത്തേണ്ട കാര്യമില്ല. കല്യാണരാമൻ, ചാന്ത്പൊട്ട്, തൊമ്മനും മക്കളും, പോത്തൻവാവ, ഛോട്ടാമുംബൈ, അണ്ണൻ തമ്പി, മേരിക്കുണ്ടൊരു കുഞ്ഞാട്, സൗണ്ട് തോമ തുടങ്ങി നിരവധി ചിത്രങ്ങളുടെ തിരക്കഥാകൃത്താണ് ഇദ്ദേഹം. ഇദ്ദേഹത്തിന്‍റെ മകള്‍ അന്ന ബെൻ കേവലം രണ്ട് സിനിമകള്‍ കൊണ്ട് മാത്രം മലയാളത്തിലെ പുത്തൻ നായികമാരുടെ ഗണത്തിൽ മുൻപന്തിയിൽ നിൽക്കുന്ന താരവുമാണ്. കുമ്പളങ്ങി നൈറ്റ്സ്, ഹെലൻ തുടങ്ങിയ ഈ വർഷത്തെ ഹിറ്റ് ചിത്രങ്ങളിലെ നായികയായിരുന്നു അന്ന. എന്നാൽ ഇതുവരെ തിരക്കഥാകൃത്തായ അച്ഛനോടൊപ്പം അന്ന ഒരു ചിത്രം ചെയ്തിരുന്നില്ല. ആ വിഷമം എന്നാൽ ഇനി മാറുകയാണ്. അന്ന നായികയാകുന്ന പുതിയ ചിത്രത്തിൽ വില്ലൻ വേഷം അവതരിപ്പിക്കാനായി ഒരുങ്ങുകയാണ് ബെന്നി പി നായരമ്പലം.
2020-ൽ സംവിധായകൻ ഷാഫി ഒരുക്കുന്ന ചിത്രത്തിലാണ് ഇരുവരും ഒരുമിച്ചഭിനയിക്കാൻ ഒരുങ്ങുന്നതെന്നാണ് പുറത്തുവന്നിരിക്കുന്ന റിപ്പോര്‍ട്ട്. ഷാഫിയുടെ നിരവധി ചിതങ്ങള്‍ക്ക് തിരക്കഥയൊരുക്കിയിട്ടുള്ള ആളുമാണ് ബെന്നി പി നായരമ്പലം. എന്നാൽ ഇക്കുറി അഭിനേതാവായാണ് ബെന്നി പി നായരമ്പലം ഷാഫിയോടൊപ്പം കൈകോര്‍ക്കുന്നതെന്നാണ് അറിയാൻ കഴിഞ്ഞിരിക്കുന്നത്.
Post Your Comments