അന്ന് ജൂനിയര്‍ നടന്‍, ഇന്ന് മലയാളത്തിന്റെ നായകന്‍ ; യുവനടന്റെ ആദ്യകാല ചിത്രം വൈറല്‍

യുവനടന്മാരില്‍ ഏറെ ശ്രദ്ധിക്കപ്പെട്ട താരമാണ് ഷെയ്ൻ നിഗം. നടൻ അബിയുടെ മകനായ ഷെയ്ൻ ബാല നടനായി എത്തുകയും വ്യത്യസ്തമായ വേഷങ്ങളിലൂടെ നായകനിരയിലേയ്ക്ക് എത്തുകയും ചെയ്ത താരങ്ങളില്‍ ഒരാളാണ്. ഡാൻസ് റിയാലിറ്റി ഷോയിലൂടെയും ‘മൈ ഡിയർ കുട്ടിച്ചാത്തൻ’ എന്ന ടെലിവിഷൻ സീരിയലിലൂടെയും അഭിനയരംഗത്തെത്തിയ ഷെയ്ന്റെ ആദ്യകാല ചിത്രങ്ങളിലൊന്നായിരുന്നു പൃഥ്വിരാജ് നായകനായ അൻവര്‍. ചിത്രത്തിലെ അധികമാരും ശ്രദ്ധിക്കാത്ത ഒരു പ്രകടനത്തിന്റെ വിഡിയോ സോഷ്യൽ മീഡിയയിൽ വൈറലാകുന്നു.

അൻവറിൽ ഒരു സീനിൽ വന്നുപോവുന്ന കൗമാരക്കാരനായ ഷെയ്ന്റെ വീഡിയോ ആണ് ആരാധകര്‍ ഏറ്റെടുത്തിരിക്കുന്നത്. പൃഥ്വിരാജിന്റെ കഥാപാത്രം ഒരു ടെലഫോൺ ബൂത്തിൽ ഫോൺ ചെയ്യാൻ എത്തുമ്പോൾ, ഫോണിൽ കാമുകിയോട് സല്ലപിച്ചുകൊണ്ടിരിക്കുന്ന സ്കൂൾ വിദ്യാർത്ഥിയുടെ വേഷത്തിലാണ് ഷെയ്ൻ.‘എന്തൊരു ചൂടാടോ.. തനിക്ക് ഇതൊക്കെ ഒന്ന് ഏസി ആക്കി കൂടെ?’ ‘അയൽപ്പക്കത്തെ ഐഎസ്ഡിയെ കണ്ടിട്ട് വീട്ടിലെ ലോക്കലിനെ ഉപേക്ഷിച്ചോട്ടോ, തനിക്കു ഞാൻ വച്ചിട്ടുണ്ട്,’ എന്നൊക്കെ ബൂത്തുടമയോട് കയർത്ത് ഇറങ്ങിപ്പോവുന്ന കലിപ്പ് പയ്യന്റെ റോളിലാണ് ഷെയ്ൻ. ‘മച്ചാൻ അന്നേ കലിപ്പാണല്ലേ?’ തുടങ്ങിയ കമന്റുകളുമായി ആരാധകർ വിഡിയോ ഏറ്റെടുത്തു കഴിഞ്ഞു

കിസ്മത്ത്, പറവ, സൈറ ബാനു, ഈട, കുമ്പളങ്ങി നൈറ്റ്സ്, ഓള്, ഇഷ്ക് തുടങ്ങി തുടർഹിറ്റുകളിലൂടെ പ്രേക്ഷകരുടെ പ്രിയപ്പെട്ട നടനായി വളർന്ന താരത്തിന്റെ റിലീസ് ചെയ്യാനുള്ള ചിത്രങ്ങള്‍ . ‘വലിയ പെരുന്നാൾ’, ‘ഉല്ലാസം’ എന്നിവയാണ്.