മലയാളം ബിഗ് ബോസ് റിയാലിറ്റി ഷോ അവസാനിക്കാന്‍ ഒരു ദിവസം മാത്രം. പതിനാറ് മത്സരാര്‍ഥികളില്‍ തുടങ്ങിയ ഷോയില്‍ ഫൈനലിസ്റ്റുകളായി നിലവില്‍ അവശേഷിക്കുന്നത് 5 പേര്‍ മാത്രമാണ്. സാബുമോന്‍, പേളി മാണി, ശ്രീനിഷ് അരവിന്ദ്, അരിസ്റ്റോ സുരേഷ്, ഷിയാസ് കരിം എന്നിവര്‍. ഇവരില്‍ ആരാകും ഷോയിലെ വിജയി എന്നറിയാന്‍ ആകാംഷയോടെ കാത്തിരിക്കുകയാണ് ആരാധകര്‍. ബിഗ് ബോസ് അവതാരകനായ മോഹന്‍ലാല്‍ അതിനെക്കുറിച്ച് പറയുന്നു.
‘ആരാവും ഫൈനല്‍ വിജയി എന്നറിയാന്‍ ഞാനും നിങ്ങളെപ്പോലെ കാത്തിരിക്കുകയാണ്. ആകസ്മികതകളാണ് ബിഗ് ബോസ് ഷോയുടെ ഏറ്റവും വലിയ പ്രത്യേകത. ഏത് നിമിഷവും എന്തും സംഭവിക്കാം. പ്രേക്ഷകരുടെ വോട്ടിംഗ് നിലകള്‍ മാറിമറിയാം. പ്രേക്ഷകര്‍ ഇതുവരെ വിജയസാധ്യത കല്‍പിച്ചവര്‍ തന്നെ വിജയകിരീടം ചൂടിയേക്കാം. എന്നാല്‍ ചിലപ്പോള്‍ അവസാന റൗണ്ട് വരെ പിന്നിലായിരുന്നവര്‍ ട്രാക്കില്‍ വിജയക്കുതിപ്പ് നടത്തി മുന്നിലായേക്കാം. പ്രേക്ഷകരുടെ വോട്ടുകള്‍ മാത്രമാണ് മത്സരാര്‍ഥികളുടെ ജയപരാജയങ്ങള്‍ നിര്‍ണയിക്കുക. കലാശപോരാട്ടത്തിനും അവര്‍ക്ക് നിങ്ങളുടെ വോട്ട് കൂടിയേ കഴിയൂ. ഇന്ന് രാത്രി 12 വരെ വോട്ട് ചെയ്യാം.’
അവശേഷിക്കുന്ന അഞ്ച് ഫൈനലിസ്റ്റുകള്‍ക്കൊപ്പം ഇതുവരെ പുറത്താക്കപ്പെട്ട മുഴുവന്‍ മത്സരാര്‍ഥികളും നാളെ വേദിയിലെത്തും.
Post Your Comments