ജീവിച്ചിരിക്കുന്നവരെ ഇങ്ങനെ കൊല്ലരുത് : ട്രോളന്മാരെ ട്രോളി സലിം കുമാര്‍

സമൂഹ മാധ്യമത്തെ ആളുകള്‍ ഏറെ നെഞ്ചോട് ചേര്‍ത്ത് തുടങ്ങിയത് ട്രോളന്മാരുടെ വരവോടു കൂടിയാണ്. അന്നന്ന് നടക്കുന്ന എന്ത് സംഭവങ്ങളുമായിക്കൊള്ളട്ടെ ചൂടപ്പം പോലെ ട്രോള്‍ റെഡി. ആരെന്ന് നോട്ടമില്ല. ട്രോളന്മാരുടെ വലയില്‍ നിന്ന് പ്രധാനമന്ത്രിക്ക് പോലും രക്ഷയില്ലാത്ത അവസ്ഥയായിക്കഴിഞ്ഞു. അതിനിടയില്‍ ട്രോളന്മാരെ ട്രോളി രംഗത്തെത്തിയിരിക്കുകയാണ് നടന്‍ സലിം കുമാര്‍. അതും തമാശയല്ല അല്‍പം സീരിയസ് ട്രോള്‍. സലിം കുമാര്‍ ദീര്‍ഘനാള്‍ സിനിമയില്‍ നിന്ന് വിട്ടു നിന്നയാളാണ്. അതിനിടയില്‍ തന്റെ മുഖം ജനങ്ങള്‍ മറക്കാതിരുന്നതിന് കാരണം ട്രോളന്മാരാണെന്ന് സലിം കുമാര്‍ തന്നെ സമ്മതിക്കുന്നുമുണ്ട്. പക്ഷേ ഇപ്പോള്‍ ട്രോളന്മാരോട് സലിം കുമാറിന്റെ വക ഓരേയൊരു ചോദ്യം മാത്രം.

എന്തിനാണ് ജീവിച്ചിരിക്കുന്നവരെ കൊലവിളിക്കുന്ന ട്രോളുകള്‍ ഇറക്കുന്നത്. പ്രമുഖ മാധ്യമത്തിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം തുറന്ന് പറഞ്ഞത്. ജീവിച്ചിരിക്കുന്ന നടന്മാരെ വരെ മരിച്ചവരായി ചിത്രീകരിക്കുന്നത് എന്തിനാണ്. എന്നാല്‍ ഇത് ട്രോളന്മാരുടെ പണിയാണോ എന്നും ട്രോള്‍ രീതിയിലാണോ ഇത് ഇടുന്നതെന്നും താരം കടുപ്പിച്ച് പറഞ്ഞില്ല. ഇത്തരത്തിലുള്ള തമാശകള്‍ പാടില്ലെന്ന് അദ്ദേഹം വ്യക്തമാക്കി. അടുത്തിടെ ജീവിച്ചിരുന്ന ഒരു നടനെ മരിച്ചതായി സമൂഹമാധ്യമത്തില്‍ ചിത്രീകരിച്ച് കാണിച്ചതും അദ്ദേഹം ഓര്‍ത്തു. അദ്ദേഹം ഇപ്പോഴും ജീവിച്ചിരുന്ന വിവരം പുറത്തറിയിക്കാന്‍ സമൂഹമാധ്യമം തന്നെ ഉപയോഗിക്കേണ്ടി വന്ന വിവരവും അദ്ദേഹം ഓര്‍മ്മിപ്പിച്ചു. നേരത്തെ സലീം കുമാര്‍ മരിച്ചുവെന്ന പേരില്‍ നിരവധി പോസ്റ്റുകളാണ് സമൂഹമാധ്യമങ്ങളില്‍ പ്രചരിച്ചിരുന്നത്.