മലയാളത്തിലെ സൂപ്പർ സ്റ്റാർ മമ്മൂട്ടി നായകനാകുന്ന ഏറ്റവും പുതിയ ചിത്രമാണ് അബ്രഹാമിന്റെ സന്തതികൾ. ചിത്രത്തിന്റെ ട്രെയിലർ പുറത്തിറങ്ങിയതോടെ ഏറെ പ്രതീക്ഷയിലാണ് ആരാധകർ. മമ്മൂട്ടിയുടെ ലുക്കും ഉദ്വേഗം ജനിപ്പിക്കുന്ന രംഗങ്ങളും കൊണ്ട് സമ്പന്നമായിരുന്നു ചിത്രത്തിന്റെ ട്രെയിലര്‍.
എന്നാൽ ട്രെയിലറിൽ പോലും ചില നിഗൂഢതകളും സസ്പെൻസുകളും ഒളിപ്പിച്ചുവെച്ചിരിക്കുകയാണ് അണിയറ പ്രവർത്തകർ. ട്രെയിലറില്‍ മമ്മൂട്ടി വന്നിറങ്ങുന്ന കാറിന്റെ നമ്പറുമായി ബന്ധപ്പെട്ട കാര്യങ്ങൾ സോഷ്യല്‍ മീഡിയയിൽ വലിയ ചർച്ചകൾക്ക് വഴിയൊരുക്കിയിരുന്നു.
ബൈബിളില്‍ അബ്രഹാമിന്റെ മരണം രേഖപ്പെടുത്തിയിരിക്കുന്നത് ബി.സി 1821 ലാണ്. എന്നാല്‍ ട്രെയിലറിൽ മമ്മൂട്ടി ഉപയോഗിക്കുന്ന കാറിന്റെ നമ്പറും ഇതേ സംഖ്യ തന്നെയാണ്. ഒരു പക്ഷേ ബൈബിളിലെ അബ്രഹാമിന്റെ സ്വഭാവത്തോട് ചേർന്ന് നിൽക്കുന്ന കഥാപാത്രമായിരിക്കും മമ്മൂട്ടിയുടേത് എന്നാണ് സോഷ്യൽ മീഡിയയിൽ ചിലർ വ്യക്തമാക്കിയത്.
എന്നാൽ ചിത്രത്തിന്റെ ട്രെയിലറിൽ പോലും സസ്‌പെൻസ് കൊണ്ടുവന്ന അണിയറക്കാർ ചിത്രം കാണാൻ കാത്തിരിക്കൂ എന്നുമാത്രമാണ് പറഞ്ഞത്. രഹസ്യം എന്തെന്ന് അറിയാൻ ഈദ് റിലീസായി ചിത്രം തീയറ്ററുകളിലെത്തുന്നതുവരെ കാത്തിരിക്കുകയേ നിവൃത്തിയുള്ളൂ. ചിത്രത്തില്‍ ഡെറിക് എബ്രഹാമെന്ന പോലീസ് ഓഫീസറായിട്ടാണ് മമ്മൂട്ടി വേഷമിടുന്നത്. ആന്‍സണ്‍ പോള്‍ മമ്മൂട്ടിക്കൊപ്പം പ്രധാന വേഷത്തിലെത്തുന്നു. കനിഹ, രഞ്ജി പണിക്കര്‍, സിദ്ദിഖ്, കലാഭവന്‍ ഷാജോണ്‍, യോഗ് ജപ്പി തുടങ്ങിയവരാണ് മറ്റു പ്രധാന താരങ്ങള്‍.
Post Your Comments