പെരുന്നാളിന് മോഹന്‍ലാലിനും മമ്മൂട്ടിയ്ക്കുമൊപ്പം പൃഥ്വിരാജ് എത്തില്ലേ എന്ന സംശയത്തിലാണ് ആരാധകര്‍. റമദാന്‍ നോമ്പിന്റെ ആലസ്യത്തില്‍ നിന്നും പെരുന്നാള്‍ ആഘോഷിക്കാന്‍ പതിനഞ്ചോടെ ചിത്രങ്ങള്‍ എല്ലാം എത്തിതുടങ്ങും. മോഹന്‍ലാലിന്‍റെ നീരാളി, മമ്മൂട്ടി നായകനാവുന്ന അബ്രഹാമിന്‍റെ സന്തതികള്‍, ജയസൂര്യയുടെ ഞാന്‍ മേരിക്കുട്ടി എന്നീ ചിത്രങ്ങളൊക്കെ റിലീസ് ഡേറ്റ് പ്രഖ്യാപിച്ചു കഴിഞ്ഞു. എന്നാല്‍ പൃഥ്വിരാജിന്റെ മൈ സ്റ്റോറിയുടെ റിലീസ് തീയതി പ്രഖ്യാപിച്ചിട്ടില്ല. എന്ന് നിന്‍റെ മോയ്തീന് ശേഷം പൃഥ്വിയും പാര്‍വതിയും ഒരുമിച്ചെത്തുന്ന ചിത്രമാണ് മൈ സ്റ്റോറി. ശങ്കര്‍ രാമകൃഷ്ണന്‍റേതാണ് തിരക്കഥ. മൈ സ്റ്റോറിയുടെ റിലീസ് ഡേറ്റ് ഈ മാസം 15നെന്ന് സോഷ്യല്‍ മീഡിയയില്‍ പ്രചരിക്കുകയാണ്. എന്നാല്‍ ചിത്രത്തിന്‍റെ റിലീസിനെക്കുറിച്ച് ഒരു മാധ്യമത്തിനു നല്‍കിയ അഭിമുഖത്തില്‍ സംവിധായിക പറയുന്നു.
റോഷ്നിയുടെ വാക്കുകള്‍ ഇങ്ങനെ.. “ജൂണ്‍ 15 എന്ന റിലീസ് തീയ്യതിയാണ് ഞങ്ങളുടെയും മനസ്സില്‍. എന്നാല്‍ ആ തീയ്യതി മാറാന്‍ സാധ്യതയുണ്ടെങ്കില്‍ അതിനു കാരണം നിപയാണ്. മലയാള സിനിമയുടെ ഏറ്റവും വലിയ സീസണുകളിലൊന്നാണ് പെരുന്നാള്‍. മലപ്പുറം, കോഴിക്കോട് മേഖലകളിലൊക്കെ വലിയ കളക്ഷന്‍ ലഭിക്കുന്ന കാലം. നിപ സൃഷ്ടിക്കുന്ന കണ്‍ഫ്യൂഷന്‍ വരുംദിവസങ്ങളില്‍ വിലയിരുത്തിയതിന് ശേഷം അടുത്തയാഴ്ചയോടെ റിലീസ് തീയ്യതിയുടെ കാര്യത്തില്‍ ഒരു അന്തിമ തീരുമാനത്തിലെത്തും. 15ന് സിനിമ എത്തുമോ ഇല്ലയോ എന്ന കാര്യം അടുത്ത ആഴ്ച തീരുമാനിക്കാനാവും..”
Post Your Comments