മലയാള സിനിമയില്‍ നിന്നും കുറച്ചു കാലമായി മാറി നില്‍ക്കുന്ന സൂപ്പര്‍ താരം സുരേഷ് ഗോപി അഭിനയ രംഗത്തേയ്ക്ക് തിരിച്ചെത്തുന്നു. രാഷ്ട്രീയത്തില്‍ പ്രവേശിച്ചതോടെ സുരേഷ് ഗോപി സിനിമയില്‍ സജീവമല്ലായിരുന്നു. നീണ്ട ഇടവേളയ്ക്ക് ശേഷം തന്റെ തന്നെ എക്കാലത്തെയും മികച്ച കഥാപാത്രങ്ങളിലൊന്നായ ലേലത്തിലെ ആനക്കാട്ടില്‍ ചാക്കോച്ചിയായി വീണ്ടും എത്തുകയാണ് സുരേഷ് ഗോപി.
ലേലത്തിന്റെ രണ്ടാംഭാഗം വരുന്നതായി നേരത്തെ പ്രഖ്യാപിച്ചിരുന്നു. സുരേഷ് ഗോപിക്ക് പകരം മറ്റാരെങ്കിലുമായിരിക്കും പ്രധാന റോളില്‍ എത്തുക എന്നായിരുന്നു പ്രചാരണം. രഞ്ജി പണിക്കറിന്റെ തിരക്കഥയില്‍ ജോഷിയാണ് ലേലം സംവിധാനം ചെയ്തിരിക്കുന്നത്. എന്നാല്‍ ലേലത്തിന്റെ രണ്ടാം ഭാഗം സംവിധാനം ചെയ്യുന്നത് നിഥിന്‍ രഞ്ജി പണിക്കറാണ്. ലേലം 2 എന്നു പേരിട്ടിരിക്കുന്ന സിനിമയുടെ കഥ, തിരക്കഥ, സംഭാഷണം നിര്‍വഹിക്കുന്നത് രഞ്ജി പണിക്കറാണ്.
രഞ്ജി പണിക്കര്‍ എന്റര്‍ടെയ്ന്‍മെന്റിന്റെ ബാനറിലാണ് ചിത്രം നിര്‍മിക്കുന്നത്. ചിത്രത്തില്‍ അഭിനയിക്കാന്‍ താരങ്ങളെ തേടിക്കൊണ്ട് രഞ്ജി പണിക്കര്‍ പോസ്റ്റിട്ടിട്ടുണ്ട്. 25 നും 40 നും ഇടയില്‍ പ്രായമുള്ള പുരുഷന്മാരെയാണ് തേടുന്നത്. നിഥിന്‍ രഞ്ജി പണിക്കറിന്റെ രണ്ടാമത്തെ ചിത്രമാണിത്. മമ്മൂട്ടി നായകനായെത്തിയ കസബയായിരുന്നു ആദ്യ ചിത്രം.
Post Your Comments