സൂപ്പർ താരങ്ങളുടെ സാന്നിധ്യത്തിൽ ‘അമ്മമഴവില്ല്’ വിരിഞ്ഞു

മലയാള സിനിമയിലെ താരങ്ങളുടെ സംഘടനായ ‘അമ്മ’യും മലയാളം ടെലിവിഷൻ ചാനലായ മഴവിൽ മനോരമയും കൈകോർക്കുന്നു. ‘അമ്മ മഴവില്ല്’ എന്ന താരങ്ങളുടെ ഷോയുടെ ലോഗോ കൊച്ചിയിൽ പ്രകാശനം ചെയ്തു. അഭിനേതാക്കളായ മമ്മൂട്ടിയുടേയും മോഹൻലാലിന്റേയും സാന്നിധ്യത്തിൽ അമ്മ പ്രസിഡന്റ് ഇന്നസെന്റാണ് ലോഗോ പ്രകാശനം ചെയ്തത്. അടുത്തമാസം ആറിന് തിരുവനന്തപുരം ഗ്രീൻഫീൽഡ് സ്റ്റേഡിയത്തിലാണ് അഞ്ചുമണിക്കൂർ നീളുന്ന ‘അമ്മ മഴവില്ല്’ ഷോ അരങ്ങേറുക.

അഞ്ചുമണിക്കൂർ നീളുന്ന ഷോയിൽ മലയാള സിനിമയിലെ നൂറിലേറെ അഭിനേതാക്കൾ പങ്കെടുക്കും. ‘അമ്മ’യുടെ സിൽവർ ജൂബിലി ആഘോഷങ്ങൾക്കുമുന്നോടിയായാണ് ഷോ സംഘടിപ്പിക്കുന്നത്. സംവിധായകൻ സിദ്ദീഖാണ് ‘അമ്മ മഴവില്ല്’ ഷോ അണിയിച്ചൊരുക്കുന്നത്.