യുവ നടന് വേണ്ടി സഞ്ചരിക്കുന്ന ആഡംബര ജിം!!

സിനിമാ മേഖലയില്‍ നിന്നും ഒരു പുതിയ വാര്‍ത്തകൂടി. താരങ്ങള്‍ക്കായി ആഡംബര കാരവന്‍ ഒരുക്കുന്നത് നമ്മള്‍ കണ്ടു കഴിഞ്ഞു. അതിന്റെ പേരില്‍ പ്രചരിക്കുന്ന ഗോസിപ്പ് കഥകളും. എന്നാല്‍ ഇപ്പോള്‍ സഞ്ചരിക്കുന്ന ജിനേഷ്യവും സിനിമലോകത്തേക്ക് വരുന്നു. കന്നഡ നടന്‍ നിഖില്‍ കുമാരസ്വാമിക്ക് വേണ്ടിയാണ് 1.75 കോടി രൂപ വിലയുള്ള ഈ ആഡംബര ജിംനേഷ്യം നിര്‍മിച്ചിരിക്കുന്നത്.

മുന്‍ പ്രധാനമന്ത്രി എച്ച്‌.ഡി. ദേവഗൗഡയുടെ പൗത്രനും കര്‍ണാടകയിലെ പ്രമുഖ രാഷ്ട്രീയ നേതാവുമായ എച്ച്‌.ഡി. കുമാരസ്വാമിയുടെ മകനുമാണ് നിഖില്‍. ഇദ്ദേഹത്തിനു വേണ്ടി ഈ ജിം ഒരുക്കുന്നത് കോതമംഗലം ഓജസിലാണ്. ബെഡ്‌റൂം, റസ്റ്റ് റൂം, ടോയ്‌ലെറ്റ്, ഫ്രിഡ്ജ്, ഓവന്‍ എന്നിവയുള്ള 1.75 കോടിയുടെ ആഡംബര കാരവനും ഇവിടെ പണിയുന്നുണ്ട്. 75 ശതമാനം നിര്‍മാണവും പൂര്‍ത്തിയായി കഴിഞ്ഞു. മോഹന്‍ലാല്‍, മമ്മൂട്ടി, സുരേഷ് ഗോപി, പൃഥ്വിരാജ്, അനൂപ് മേനോന്‍, പ്രിയദര്‍ശന്‍ തുടങ്ങി സിനിമാലോകത്തേക്ക് ഉള്‍പ്പെടെ 40 കാരവന്‍ ഓജസില്‍ നിര്‍മിച്ചിട്ടുണ്ട്.

വാഹനത്തേക്കാള്‍ വിലകൂടിയതാണ് ജിനേഷ്യം. ജിനേഷ്യത്തിനു മാത്രം ഒരു കോടി രൂപയും വാഹനത്തിന് 75 ലക്ഷം രൂപയുമാണ് നിര്‍മാണ ചെലവ്. ഏഴ് ലക്ഷം രൂപയുടെ ബോഡി ബൈക്ക് ഉള്‍പ്പെടെ മള്‍ട്ടിപ്പര്‍പ്പസ് ജിം ഉപകരണങ്ങളെല്ലാം വിദേശത്തുനിന്ന് ഇറക്കുമതി ചെയ്തവയാണ്. റിമോട്ട് കണ്‍ട്രോള്‍ ഓപ്പറേറ്റിങ് സിസ്റ്റത്തിലാണ് ജിം, ഡോര്‍, സ്റ്റംപ്പ് എന്നിവ പ്രവര്‍ത്തിക്കുന്നത്. എയര്‍കണ്ടീഷന്റ് ജിനേഷ്യത്തിന്റെ ഇരുവശവും കണ്ണാടിയും താഴെ റബ്ബറൈസ് മാറ്റും മുകളിലും വശത്തു നിന്നും കണ്ണഞ്ചിപ്പിക്കുന്ന എല്‍.ഇ.ഡി. പ്രകാശവും ബോസ് സൗണ്ട് സിസ്റ്റവും കൊണ്ട് മനോഹരമാക്കിയിരിക്കുകയാണ്. ഇന്ത്യയിലെ ആദ്യത്തെ ചലിക്കുന്ന ജിനേഷ്യം കൂടിയാണിതെന്ന് നിര്‍മാതക്കള്‍ അവകാശപ്പെട്ടു. ആഡംബര ജിമ്മില്‍ ആസ്വദിച്ച്‌ വ്യായാമം ചെയ്യാവുന്നവിധമാണ് സജ്ജീകരണം. ലൊക്കേഷന്‍ എവിടെയായാലും പതിവ് വ്യായാമം മുടങ്ങാതിരിക്കാനാണ് സഞ്ചരിക്കുന്ന ജിനേഷ്യം ഒരുക്കിയിരിക്കുന്നത്.