മോഹന്‍ലാല്‍ നായകനാകുന്ന ഒടിയനില്‍ അമിതാഭ് ബച്ചനും അഭിനയിക്കുമെന്ന് സൂചന. ഒടിയന്‍ മാണിക്യന്‍റെ ഗുരുവായി ഒരു ബോളിവുഡ് താരം അഭിനയിക്കുമെന്ന് സംവിധായകന്‍ ശ്രീകുമാര്‍ മേനോന്‍ ഇന്നലെയാണ് വെളിപ്പെടുത്തിയത്. ആ നടന്‍ ആരാണെന്ന് അദ്ദേഹം പറഞ്ഞില്ലെങ്കിലും അമിതാഭാണ് ഗുരുവിന്‍റെ വേഷം ചെയ്യുന്നത് എന്ന അഭ്യുഹം ശക്തമാണ്.
ഒടിയനില്‍ മോഹന്‍ലാല്‍ കഴിഞ്ഞാല്‍ ഏറ്റവുമധികം പ്രാധാന്യമുള്ള കഥാപാത്രമാണ് ഗുരുവിന്‍റെത്. മാണിക്യനെ പോലെ അദ്ദേഹവും രണ്ട് ഗെറ്റപ്പുകളില്‍ പ്രത്യക്ഷപ്പെടുന്നുണ്ട്. അമിതാഭ് ആ വേഷത്തില്‍ എത്തുമെന്നാണ് പൊതുവേ
കരുതപ്പെടുന്നത്. ചിരഞ്ജീവി നായകനാകുന്ന പുതിയ തെലുഗു സിനിമയില്‍ അദ്ദേഹത്തിന്‍റെ ഗുരുവായി അഭിനയിച്ചു കൊണ്ടിരിക്കുകയാണ് അമിതാഭ് ഇപ്പോള്‍. ബിഗ്‌ ബിയുടെ സന്യാസ വേഷത്തിലുള്ള ചിത്രങ്ങള്‍ കഴിഞ്ഞ ദിവസം സോഷ്യല്‍ മീഡിയയില്‍ വൈറലായിരുന്നു.
അമിതാഭുമായി വളരെ അടുത്ത ബന്ധമാണ് മോഹന്‍ലാലിനും ശ്രീകുമാര്‍ മേനോനും ഉള്ളത്. ബച്ചന്‍ അഭിനയിച്ച നിരവധി പരസ്യങ്ങള്‍ മേനോന്‍ സംവിധാനം ചെയ്തിട്ടുണ്ട്. ഇക്കാരണങ്ങള്‍ കൊണ്ട് ഒടിയനില്‍ അമിതാഭ് ഉണ്ടാകും എന്ന് തന്നെയാണ് ആരാധകരുടെ പ്രതിക്ഷ.
Post Your Comments