ക്രിസ്മസിന് തിയേറ്ററുകളില്‍ ആരവം കൂട്ടാന്‍ ഇത്തവണ സൂപ്പര്‍താര ചിത്രങ്ങള്‍ അടക്കം ഏഴു ചിത്രങ്ങള്‍. മമ്മൂട്ടിയുടെ മാസ്റ്റര്‍ പീസ്, പൃഥിരാജിന്റെ വിമാനം, ആഷിഖ് അബു ടൊവിനോ ചിത്രം മായാനദി, ജയസൂര്യയുടെ ആട്2, വിനീത് ശ്രീനിവാസന്റെ ആനഅലറലോടലറല്‍, എന്നീ മലയാള ചിത്രങ്ങള്‍ക്കൊപ്പം മത്സരിക്കാന്‍ ഫഹദ് ഫാസില്‍ വില്ലന്‍ വേഷത്തിലെത്തുന്ന വേലൈക്കാരന്‍, ടൈഗര്‍ സിന്ദ ഹേ എന്ന ഹിന്ദി ചിത്രവുമുണ്ട്.
ക്യാംപസിന്റെ കഥപറയുന്ന ചിത്രം മാസ്റ്റര്‍പീസ് ഡിസംബര്‍ 21 നാണ് തിയേറ്ററുകളില്‍ എത്തുക. മമ്മൂട്ടി കോളേജ് പ്രൊഫസറുടെ വേഷത്തിലെത്തുന്ന ചിത്രം സംവിധാനം ചെയ്യുന്നത് അജയ് വാസുദേവാണ്. സന്തോഷ്‌ പണ്ഡിറ്റ്‌ ചിത്രത്തില്‍ ഒരു പ്രധാന വേഷത്തില്‍ എത്തുന്നു.
പൃഥിരാജിനെ നായകനാക്കി പ്രദീപ് എം നായര്‍ സംവിധാനം ചെയ്യുന്ന ചിത്രമാണ് വിമാനം. തൊടുപുഴ സ്വദേശി സജിയുടെ ജീവിതത്തില്‍ നിന്ന് പ്രചോദനം ഉള്‍ക്കൊണ്ടുകൊണ്ടാണ് ഈ സിനിമ നിര്‍മിച്ചിരിക്കുന്നത്. ബധിരനും മൂകനുമായ സജി സ്വന്തമായി വിമാനം നിര്‍മിക്കുന്നതാണ് സിനിമയുടെ പ്രമേയം. ഡിസംബര്‍ 22 ന് തിയേറ്ററുകളില്‍ എത്തും.
റാണി പത്മിനിക്ക് ശേഷം ആശിഖ് അബു സംവിധാനം ചെയ്യുന്ന ചിത്രമാണ് മായാനദി. ടൊവിനോ തോമസും ഐശ്വര്യാ ലക്ഷ്മിയുമാണ് കേന്ദ്ര കഥാപാത്രങ്ങള്‍. പ്രണയ കഥ പറയുന്ന മായാനദി ഡിസംബര്‍ 22 ന് തിയേറ്ററുകളില്‍ എത്തും.
വിനീത് ശ്രീനിവാസന്‍ നായകനാകുന്ന ചിത്രമാണ് ആന അലറലോടലറല്‍. അനു സിത്താരയാണ് നായിക. ദിലീപ് മേനോന്‍ ഒരുക്കിന്ന ചിത്രം ഡിസംബര്‍ 22 പ്രദര്‍ശനത്തിന് എത്തും.
ആരാധകര്‍ ഏറെ ആവേശത്തോടെ കാത്തിരിക്കുന്ന ചിത്രമാണ് ആട് ഒരു ഭീകരജീവി 2. ഷാജി പാപ്പാനും പിള്ളേരും ഡിസംബര്‍ 22നു എത്തും. തിയറ്ററില്‍ പരാജയപ്പെടുകയും പിന്നീട് വന്‍ വിജയമാകുകയുംചെയ്ത പ്രേക്ഷകര്‍ ഏറ്റെടുത്ത ആട് ഒരു ഭീകരജീവിയുടെ രണ്ടാം ഭാഗമാണ് ഈ ചിത്രം. മിഥുന്‍ മാനുവല്‍ തോമസ് സംവിധാനം ചെയ്യുന്ന ഈ ചിത്രത്തിലും ജയസൂര്യയാണ് നായകന്‍.
ശിവകാര്‍ത്തികേയനും ഫഹദ് ഫാസിലും ഒന്നിക്കുന്ന ചിത്രമാണ് വേലൈക്കാരന്‍. ഫഹദ് ഫാസില്‍ ആദ്യമായി വില്ലന്‍ വേഷത്തിലെത്തുന്ന തമിഴ് ചിത്രമാണിത്. ഡിസംബര്‍ 22 ന് ചിത്രം തിയേറ്ററുകളില്‍ എത്തും. നയന്‍ താരയാണ് നായിക. മോഹന്‍രാഡ സംവിധാനം ചെയ്യുന്ന ചിത്രമാണിത്.
സുൽത്താൻ എന്ന ചിത്രമൊരുക്കിയ അലി അബ്ബാസ് സഫർ സംവിധാനം ചിത്രമാണ് ടൈഗർ സിന്ദാ ഹേ. 2012 ല്‍ സല്‍മാന്‍ തന്നെ നായനായ എക് ത ടൈഗറിന്റെ രണ്ടാം ഭാഗമാണ് ഈ ചിത്രം. കത്രീന കൈഫാണ് ചിത്രത്തിലെ നായിക.
Post Your Comments