നീറ്റ് വഴി മെഡിക്കല്‍ പ്രവേശനം ലഭിക്കാത്തതിനെ തുടര്‍ന്ന് ആത്മഹത്യ ചെയ്ത തമിഴ്‌നാട് സ്വദേശി അനിതയുടെ കുടുംബത്തെ നടന്‍ വിജയ് സന്ദര്‍ശിച്ചതും അനിതയുടെ പിതാവിനെ ആശ്വസിപ്പിക്കുന്നതുമായ ചിത്രങ്ങള്‍ സമൂഹ മാധ്യമങ്ങളില്‍ അടുത്തിടെ വയറലായിരുന്നു.
അതിനു ശേഷം വിജയ്‍യുടെ ആരാധകര്‍ സാമ്പത്തിക സഹായം വാഗ്ദാനം നല്‍കിയെന്ന് പറഞ്ഞ് അരിയലൂരിലെ രംഗീല എന്ന പെണ്‍കുട്ടി രംഗത്തെത്തി.പക്ഷേ, ഇക്കാര്യം തങ്ങള്‍ക്ക് അറിയില്ല എന്നായിരുന്നു വിജയ് ഫാന്‍ ക്ലബ് അധികൃതര്‍ ആദ്യം പറഞ്ഞത്. എന്തായാലും പെണ്‍കുട്ടിയുടെ വിദ്യാഭ്യാസത്തിന് സാമ്പത്തികസഹായം നല്‍കാന്‍ പിന്നീട് അവര്‍ തീരുമാനിച്ചു.
ഫാന്‍സ് അസോസിയേഷനില്‍ നിന്ന് പുറത്താക്കപ്പെട്ട ഒരു അംഗമാണ് നേരത്തെ കുട്ടിക്ക് സാമ്പത്തിക സഹായ വാഗ്ദാനം നല്‍കിയത്.കന്യാകുമാരിയിലെ കോളേജില്‍ പഠിക്കുന്ന വിദ്യാര്‍ഥിനിയുടെ ഉന്നതവിദ്യാഭ്യാസത്തിന് വേണ്ട പണം സമാഹരിക്കുന്ന തിരക്കിലാണ് ഇപ്പോള്‍ വിജയ് ആരാധകര്‍.
Post Your Comments