“അന്ന് നട്ടെല്ല് ഇല്ലായിരുന്നോ”?; ദിലീപ് വിഷയത്തിനപ്പുറം മറ്റൊരു മറുചോദ്യവുമായി നടന്‍ സിദ്ധിഖ്

നടി ആക്രമിക്കപ്പെട്ട കേസില്‍ ദിലീപിനെ അറസ്റ്റ് ചെയ്തതിനെ പരാമര്‍ശിച്ച് നടന്‍ സിദ്ധിഖ് രംഗത്തെത്തി. ദിലീപ് കുറ്റക്കാരനാണെങ്കില്‍ ശിക്ഷിക്കപ്പെടുക തന്നെ ചെയ്യുമെന്നും എന്നാല്‍ തനിക്ക് മറ്റൊരു കാര്യത്തെക്കുറിച്ചാണ് ചോദിക്കാനുള്ളതെന്നും സിദ്ധിഖ് ഫേസ്ബുക്ക് പോസ്റ്റില്‍ വ്യക്തമാക്കുന്നു.

സിദ്ധിഖിന്റെ ഫേസ്ബുക്ക് പോസ്റ്റ്‌

തെറ്റ് ചെയ്തെങ്കില്‍ ദിലീപ് ശിക്ഷിക്കപ്പെടണം എന്ന് മലയാളികള്‍ക്കൊപ്പം ഞാനും ആഗ്രഹിക്കുന്നതോടൊപ്പം ഒരു ചെറിയ ചോദ്യം. കുറച്ചു മാസങ്ങള്‍ക്ക് മുന്‍പ് തന്‍റെ മുടി മുതല്‍ നഖം വരെ പിച്ചിചീന്തി ഭീഷണിപ്പെടുത്തി ക്രൂരമായി ഉപയോഗിക്കുകയും മറ്റുള്ളവര്‍ക്ക് കാഴ്ചവയ്ക്കുകയും ചെയ്തു എന്ന് പറഞ്ഞു ബോബി ചെമ്മ ചെമ്മണ്ണൂരിനെതിരെ രംഗത്ത് വരികയും തെളിവായി വീഡിയോ പുറത്തുവിടുകയും ചെയ്തിരുന്നു. അതിനെതിരെ ഒരു ചെറുവിരലനക്കാന്‍ ബോബി ചെമ്മണ്ണൂരിനെ ഒന്ന് തൊടാന്‍ പോലും ആര്‍ക്കും കഴിഞ്ഞില്ല. അന്ന് അതൊന്നും കാണാത്ത മാധ്യമങ്ങളും ഫെമിനിസ്റ്റുകളും രാഷ്ട്രീയക്കാരും കേരളത്തിലെ സമ്പൂർണ്ണ സാക്ഷര പൗരന്മാരുമാണ് ഇന്ന് ദിലീപിനെതിരെ കൊലവിളി നടത്തുന്നത്.

കോടതി കുറ്റവാളിയായി വിധിക്കാത്ത , കുറ്റാരോപണത്തിന്റെ പേരിൽ അറസ്റ്റ് ചെയ്ത ഒരാളുടെ സ്ഥാപനങ്ങളിലും മറ്റും ഇന്നലെ ആക്രമണം നടത്തിയ കേരളത്തിലെ യുവജന രാഷ്ട്രീയ സംഘടനകളോട് ഒരു ചോദ്യം, അന്ന് അയാൾക്കെതിരെ ഏതെങ്കിലും ഒരു സ്ഥാപനത്തിന് മുന്നിൽ പോയ് രണ്ട് മുദ്രാവാക്യം വിളിക്കാനോ അടിച്ചു തകർക്കാനോ എന്തേ അന്ന് നട്ടെല്ല് നിവർന്നില്ലേ. ദിലീപ് കുറ്റക്കാരനാണെങ്കിൽ ശിക്ഷിക്കപ്പെടുക തന്നെ ചെയ്യും. അതിന് മുൻപുള്ള മാധ്യമ വിചാരണ അൽപത്തരമാണ്. കോടതി ശിക്ഷ വിധിക്കുന്നത് വരെ ഒരാൾ പ്രതിയല്ല കുറ്റാരോപിതാൻ മാത്രമാണെന്ന ഞാൻ പഠിച്ച മാധ്യമ ധർമ്മം ഇവിടെ കൂട്ടിച്ചേർക്കുന്നു.