മഹാരാഷ്ട്രയിലെ നാസിക് ജില്ലയില്‍ നിന്നും കഴിഞ്ഞ ചൊവ്വാഴ്ച മുതല്‍ കാണാതായ പെണ്‍കുട്ടികളെ കണ്ടെത്തി. ബോളിവുഡ് സൂപ്പര്‍താരം ഷാരൂഖ്ഖാന്‍റെ വീടായ മന്നത്തിന് മുന്നില്‍ നിന്നാണ് ഇവരെ കണ്ടെത്തിയത്. സൂപ്പര്‍താരത്തെ നേരില്‍ കാണാനായി വീട്ടില്‍ നിന്ന് ഒടിപ്പോന്നതായിരുന്നു ഈ ആറുപേരും. താനെ, കല്ല്യാണ്‍ പോലീസിന്‍റെ സഹായത്തോടെ നടത്തിയ തിരച്ചിലിനൊടുവിലാണ് നാസിക് പോലീസ് കണ്ടെത്തിയത്.
ചൊവ്വാഴ്ച്ച രാത്രിയോടെയാണ് ഇവരെ കാണാനില്ലെന്ന് കാണിച്ച്‌ രക്ഷകര്‍ത്താക്കള്‍ പോലീസില്‍ പരാതി നല്‍കിയത്.
പെണ്‍കുട്ടികള്‍ക്ക് സിനിമാതാരങ്ങളോട് വലിയ ആരാധനയാണെന്ന് കുട്ടികളുടെ കുടുംബാഗംങ്ങള്‍ പോലീസിനോട് പറഞ്ഞിരുന്നു.
ഇതോടെയാണ് നാസികില്‍ നിന്നും പെണ്‍കുട്ടികളെ തേടി പോലീസ് സംഘം മുംബൈയിലെത്തിയത്. കുട്ടികള്‍ക്കായി റെയില്‍വേസ്റ്റേഷനുകളിലും ബസ് സ്റ്റാന്‍ഡുകളിലും പരിശോധന നടത്തിയ പോലീസ് സംഘം ഒടുവില്‍ ഇവരെ ബാന്ദ്രയിലെ ഷാരൂഖിന്റെ വീട്ടിനടുത്ത് വച്ച്‌ കണ്ടെത്തുകയായിരുന്നു.
ചൊവ്വാഴ്ച്ച വൈകുന്നേരത്തോടെ വീട്ടില്‍ നിന്നും നന്തൂരി ക്ഷേത്രത്തിലെത്തിയ കുട്ടികള്‍ അവിടെ നിന്ന് നാസിക് റെയില്‍വേ സ്റ്റേഷനിലെത്തുകയും ശതാബ്ദി എക്സ്പ്രസ്സില്‍ മുംബൈയിലെ ദാദറിലേക്ക് പോരുകയും ചെയ്തു. ഇവിടെ നിന്നാണ് ഷാരൂഖിന്റെ ബംഗ്ലാവായ മന്നത്തിലേക്ക് പെണ്‍കുട്ടികളെത്തിയത്. ഷാരൂഖ്ഖാനെ എങ്ങനെയും കാണുക എന്ന ആഗ്രഹത്തോടെയാണ് ഇവര്‍ നാസിക്കില്‍ നിന്ന് പുറപ്പെട്ടതെന്ന് പോലീസ് പറയുന്നു. പെണ്‍കുട്ടികളെല്ലാം 12-നും 15-നും മധ്യേപ്രായമുള്ളവരും ഒരേ കുടുംബത്തില്‍ നിന്നുള്ളവരാണെന്നും പോലീസ് അറിയിച്ചു
Post Your Comments