ഒരു ചെറിയ ഇടവേളയ്ക്ക് ശേഷം ലാല്‍ജോസ് ദുല്‍ഖര്‍ ചിത്രവുമായി എത്തുന്നുവെന്നായിരുന്നു റിപ്പോര്‍ട്ടുകള്‍. ഉണ്ണി ആറിന്റെ തിരക്കഥയില്‍ ദുല്‍ഖറിനെ നായകനാക്കി ചിത്രീകരിക്കുന്ന സിനിമ ‘ഒരു ഭയങ്കര കാമുകന്‍’ പ്രാഖ്യപിക്കുകയും ചെയ്തിരുന്നു. എന്നാല്‍ ഈ വര്ഷം ലാല്‍ ജോസ് ആദ്യം ചെയ്യുന്നത് മോഹന്‍ലാല്‍ ചിത്രമാണ്.
മോഹന്‍ലാലും ലാല്‍ജോസും ഒന്നിക്കുന്ന ആദ്യ ചിത്രം എന്ന പ്രത്യേകതയും ഈ സിനിമയ്ക്കുണ്ട്. ബെന്നി പി നായരമ്പലം തിരക്കഥയൊരുക്കുന്ന ഈ ചിത്രത്തില്‍ ‘അങ്കമാലി ഡയറീസിലെ’ ലിച്ചിയെ അവതരിപ്പിച്ച അന്ന രേഷ്മ രാജന്‍ നായികയാവുമെന്നും സൂചനയുണ്ട്.
നര്‍മ്മ പശ്ചാത്തലത്തില്‍ ഒരുക്കുന്ന ഒരു ലാല്‍ജോസ് ചിത്രമായിരിക്കുമിത്. ചിത്രത്തിന്റെ തിരക്കഥ ജോലികള്‍ പുരോഗമിക്കുകയാണ്. മെയ് മാസത്തില്‍ സിനിമയുടെ ചിത്രീകരണം ആരംഭിക്കുമെന്നും ചിത്രത്തില്‍ വ്യത്യസ്ഥമായ രണ്ട് ഭാവങ്ങളില്‍ മോഹന്‍ലാല്‍ എത്തുമെന്നും തിരക്കഥാകൃത്ത് ബെന്നി പി നായരമ്പലം പറയുന്നു.
ഇനിയും പേരിട്ടിട്ടില്ലാത്ത ചിത്രത്തില്‍ മോഹന്‍ലാല്‍ കോളേജ് വൈസ് പ്രിന്‍സിപ്പള്‍ റോളിലാണ് എത്തുന്നത്. ബി ഉണ്ണി കൃഷ്ണന്റെ ത്രില്ലര്‍ സിനിമ ‘വില്ലന്റെ’ ചിത്രീകരണത്തിലാണ് മോഹന്‍ലാല്‍ ഇപ്പോള്‍. ‘വില്ലന്’ ശേഷം വരാനിരിക്കുന്ന മോഹന്‍ലാലിന്റെ ചിത്രമായിരിക്കുമിത്. അവസാനം പ്രദര്‍ശനത്തിനെത്തിയ ലാല്‍ജോസ് ചിത്രം നീനയായിരുന്നു.
Post Your Comments