ക്ഷേത്ര ഉത്സവങ്ങളുടെ പൊടിപൂരത്തിനായി ഏര്‍പ്പാടാക്കിയ കോമഡി പ്രോഗ്രാം വൈകിയതിനെ ചൊല്ലി താരങ്ങളെ സംഘടകര്‍ കയ്യേറ്റം ചെയ്തതായി പരാതി. ചലച്ചിത്ര സീരിയല്‍ താരവും കോമഡി ഷോകളിലെ നിര സാന്നിധ്യവുമായ അസീസ് നെടുമങ്ങാടിനെയാണ് സംഘാടകര്‍ തല്ലിയത്. ശനിയാഴ്ച്ച വെള്ളറടയ്ക്ക് സമീപം ചാമവിളയില്‍ ഒരു ക്ഷേത്രത്തിലാണ് സംഭവം.
ടീം ഓഫ് ട്രിവാന്‍ഡ്രം എന്ന ഗ്രൂപ്പിലാണ് അസീസ് പ്രോഗ്രാം അവതരിപ്പിക്കാന്‍ എത്തിയത്. കഴിഞ്ഞ 2 ദിവസമായി വിദേശത്ത് പ്രോഗ്രാമിലായിരുന്ന അസീസ് വിമാനം വൈകിയതിനെ ത്തുടര്‍ന്ന് ഒന്നര മണിക്കൂര്‍ വൈകിയാണ് എത്തിയത്. 9.30 ആയിരുന്നു പരിപാടി വച്ചിരുന്നത്. താമസിക്കുമെന്ന കാരണം സംഘാടകരെ അസീസ് അറിയിച്ചിരുന്നു.
എന്നാല്‍ പ്രോഗ്രാം സ്ഥലത്തെത്തിയ അസീസിനെയും പത്തംഗ സംഘത്തെയും സംഘാടകര്‍ മര്‍ദ്ദിക്കുകയായിരുന്നു. ആക്രണമത്തില്‍ അസീസിന്‍റെ കര്‍ണ്ണ പടം തകര്‍ന്നതായി പരാതിയില്‍ പറയുന്നു. കൂടാതെ ആക്രമണത്തിനു ശേഷം പ്രോഗ്രാം ചെയ്യില്ലയെന്നു പറഞ്ഞ തങ്ങളെ ഭീഷണിപ്പെടുത്തി പ്രോഗ്രാം നടത്തിച്ചുവെന്നും കരാര്‍ തുക നല്‍കിയില്ലെന്നും പരാതിയില്‍ ഉന്നയിക്കുന്നു. വെള്ളറട പോലീസ് കേസെടുത്തു.
Post Your Comments