താരങ്ങള്‍ സിനിമയില്‍ പാട്ട് പാടുന്നത് ഇപ്പോള്‍ സാധാരണമാണ്. മോഹന്‍ലാലും കലാഭവന്‍ മണിയുമെല്ലാം മലയാളത്തില്‍ നിന്നുമുള്ള ഉദാഹരണങ്ങള്‍. തെലുങ്കിലും മലയാളത്തിലും ഒരുപോലെ തിളങ്ങുന്ന താരം ഉണ്ണി മുകുന്ദന്‍ പുതിയ ചിത്രത്തിലൂടെ പിന്നണി ഗാനരംഗത്ത് പ്രവേശിക്കുന്നു.
കണ്ണന്‍ താമരക്കുളം സംവിധാനം ചെയ്യുന്ന അച്ചായന്‍സ് എന്ന ചിത്രത്തിലാണ് ഉണ്ണി പാടുന്നത്. ജയറാം പ്രധാന വേഷത്തിലെത്തുന്ന ചിത്രത്തില്‍ നായിക അമലാപോള്‍ ആണ്. പ്രകാശ് രാജ് ഉള്‍പ്പെടെ വന്‍ താരനിര അഭിനയിക്കുന്ന ചിത്രത്തില്‍ ഉണ്ണിയും വേഷമിടുന്നുണ്ട്. സൂപ്പർഹിറ്റ് തിരക്കഥാകൃത്ത് സേതു ആണ് അച്ചായൻസിന്റെ തിരക്കഥ ഒരുക്കുന്നത് . ടോണി വാവച്ചൻ എന്ന അച്ചായൻ കഥാപാത്രത്തെയാണ്‌ ഉണ്ണി ചിത്രത്തില്‍ അവതരിപ്പിക്കുന്നത്‌.
സംഗീത സംവിധായകന്‍ രതീഷ്‌ വേഗയ്ക്കൊപ്പംചിത്രത്തില്‍ ഉണ്ണി പാട്ടെഴുത്തുകാരനും കൂടിയാകുന്നു. ഉണ്ണിയുടെ സ്വരം പാട്ടിനു ചേരുമെന്ന് കണ്ട സംഗീതസംവിധായകന്‍റെ നിര്‍ബന്ധപ്രകാരമാണ് ഉണ്ണി മുകുന്ദന്‍ ചിത്രത്തിനു വേണ്ടി ഒരു മെലഡി പാടിയത്.
ബാഹുബലി നായിക അനുഷ്ക ഷെട്ടി പ്രധാന കഥാപാത്രമാകുന്ന ഭാഗ്മതിയാണ് ഉണ്ണിയുടെ പുതിയ തെലുങ്ക് ചിത്രം. ഷാനിൽ മുഹമ്മദ് സംവിധാനം ചെയ്യുന്ന അവരുടെ രാവുകൾ ആണ് റിലീസ് ചെയ്യാനിരിക്കുന്ന പുതിയ മലയാള ചിത്രം.
Post Your Comments