മലയാള ചലച്ചിത്ര മേഖലയില്‍ ഇപ്പോള്‍ വന്‍ ചര്ച്ചയായിരിക്കുന്ന ചിത്രമാണ് രണ്ടാമൂഴം. എന്നാല്‍
എം.ടിയുടെ വിഖ്യാത നോവല്‍ രണ്ടാമൂഴത്തിന് അദ്ദേഹം തന്നെ തിരക്കഥയൊരുക്കി മോഹന്‍ലാല്‍ അമിതാഭ് ബച്ചന്‍ തുടങ്ങി പ്രമുഖര്‍ അഭിനയിക്കുന്ന ചിത്രം അഭ്രപാളികളില്‍ പകര്‍ത്തുന്നത് ഹരിഹരനല്ലയെന്നാണ് പുതിയ വാര്‍ത്ത. ചിത്രം ഹരിഹരന്‍ സംവിധാനം ചെയ്യുമെന്ന് ഏറെനാളായി കേള്‍ക്കുന്നു. മോഹന്‍ലാല്‍ മുഖ്യകഥാപാത്രമായി എത്തുന്ന ചിത്രത്തില്‍ നിന്ന്, എംടിയുടെ തന്നെ തിരക്കഥയില്‍ രണ്ട് ബ്രഹ്മാണ്ഡ ചിത്രങ്ങള്‍ ഒരുക്കിയിട്ടുള്ള ഹരിഹരന്‍ പിന്മാറിയെന്നാണ് റിപ്പോര്‍ട്ടുകള്‍ .
600 കോടി മുതല്‍ മുടക്കില്‍ നിര്‍മ്മിക്കുന്ന ചിത്രം സംവിധാനം ചെയ്യുന്നത് പ്രമുഖ പരസ്യചിത്ര സംവിധായകന്‍ വിഎ ശ്രീകുമാറാണ്. മഞ്ജുവാര്യറും ബച്ചനും അഭിനയിച്ച കല്യാണിന്റെ പരസ്യ ചിത്രം ഒരുക്കിയത് ശ്രീകുമാറാണ്. രണ്ടാമൂഴത്തിന്റെ തിരക്കഥ പൂര്‍ത്തിയാക്കിയതായി മോഹന്‍ലാല്‍ തന്നെയാണ് വെളിപ്പെടുത്തിയത്. ചിത്രത്തില്‍ പഞ്ചാലിയുടെ വേഷത്തില്‍ മഞ്ജുവാര്യറുടെയും ഐശ്വര്യ റായിയുടെയും പേരുകള്‍ കേള്‍ക്കുന്നുണ്ട്.
ചിത്രത്തില്‍ നിന്ന് പിന്മാറിയതിനെ കുറിച്ച്‌ ഹരിഹരന്‍ ഇതുവരെ പ്രതികരിച്ചിട്ടില്ല. തന്റെ സ്വപ്നപദ്ധതിയായി പലപ്പോഴും രണ്ടാമൂഴത്തെപ്പറ്റി ഹരിഹരന്‍ പറഞ്ഞിട്ടുണ്ട്. എംടിയുടെ തിരക്കഥയില്‍ വടക്കന്‍ വീരഗാഥയും പഴശ്ശിരാജയും ഹരിഹരന്‍ ഒരുക്കിയിട്ടുണ്ട്. രണ്ടും വലിയ ബജറ്റില്‍ ചെയ്ത ചിത്രങ്ങളായിരുന്നു.
Post Your Comments