ബിജു മേനോനെ നായകനാക്കി വി.കെ പ്രകാശ്‌ ഒരുക്കുന്ന ചിത്രമാണ് ‘മരുഭൂമിയിലെ ആന’. ചിത്രത്തിലെ ആദ്യ വീഡിയോ ഗാനം പ്രേക്ഷക ഹൃദയങ്ങള്‍ കീഴടക്കി മുന്നേറുന്നു . ആദ്യ ഗാനം റിലീസ് ചെയ്തു 24 മണിക്കൂറിന്നുള്ളില്‍ തന്നെ എഴുപതിനായിരം കാഴ്ചക്കാരിലേക്ക് ഈ വിഡിയോ കടക്കുകയാണ് . സ്വര്‍ഗം വിടരും എന്ന് തുടങ്ങുന്ന ഈ മനോഹര ഗാനം ആലപിച്ചിരിക്കുന്നത് വിജയ്‌ യേശുദാസാണ്. ബി.കെ ഹരിനാരായണനാണ് വരികള്‍ എഴുതിയിരിക്കുന്നത് .ആടുപുലിയാട്ടത്തിലെ മനോഹര ഗാനങ്ങള്‍ക്ക് ശേഷം രതീഷ്‌ വേഗ സംഗീതം നിര്‍വ്വഹിക്കുന്ന ഈ ചിത്രത്തിലെ ഗാനങ്ങള്‍ അദ്ദേഹത്തിന്‍റെ സംഗീത ജീവിതത്തില്‍ മറ്റൊരു പൊന്‍ തൂവല്‍ കൂടിയാണ് സമ്മാനിക്കുന്നത് .
ബിജുമേനോന്‍ അറബിവേഷത്തിലെത്തുന്ന ഈ ചിത്രത്തില്‍ സംസ്‌കൃതി ഷേണായിയാണ് നായിക. സുഹൃത്തിനൊപ്പം ഷെയ്ഖ് കേരളത്തിലെത്തുന്നതും തുടര്‍ന്നുള്ള രസകരമായ മുഹൂര്‍ത്തങ്ങളുമാണ് ചിത്രത്തിന്റെ ഇതിവൃത്തം. സൗഹൃദം പ്രമേയമാക്കിയ പക്കാ എന്റര്‍ടെയിനറായാണ് സംവിധായകന്‍ ചിത്രം ഒരുക്കിയിരിക്കുന്നത്. ദോഹയിലും തൃശൂരിലും ഇരിങ്ങാലക്കുടയിലുമായാണ് ചിത്രീകരണം പൂര്‍ത്തിയാക്കിയത്. ലാലു അലക്സ്, , കൃഷ്ണാ ശങ്കര്‍ ,പാഷാണം ഷാജി, മേജര്‍ രവി, ഹരീഷ് തുടങ്ങിയവരാണ് ചിത്രത്തിലെ മറ്റുപ്രധാന താരങ്ങള്‍.
ഡേവിഡ്‌ കാച്ചപ്പിള്ളി പ്രോഡക്ഷന്‍സിന്റെ ബാനറില്‍ ഡേവിഡ്‌ കാച്ചപ്പിള്ളി നിര്‍മ്മിക്കുന്ന ചിത്രത്തിന്റെ തിരകഥയൊരുക്കിയിരിക്കുന്നത് വൈ.വി രാജേഷാണ്. കഥ ശരത്ചന്ദ്രന്‍ വയനാടിന്റെതാണ്. അജയ് ഡേവിഡ്‌ കാച്ചപ്പിള്ളി ഛായാഗ്രഹണവും വി.സാജന്‍ ചിത്രസംയോജനവും നിര്‍വഹിച്ചിരിക്കുന്നു. കലാസംവിധാനം: സുജിത് രാഘവ്, പ്രൊഡക്ഷന്‍ കണ്‍ട്രോളര്‍: ബെന്നി കട്ടപ്പന. ചിത്രം ഉടന്‍ ചാന്ദ് വി ക്രീയേഷന്‍സ് കേരളത്തിലെ തീയറ്ററുകളില്‍ പ്രദര്‍ശനത്തിനെത്തിക്കും.
Post Your Comments