ആദ്യ ദിനം മുതല്‍ തന്നെ ഗംഭീര പ്രതികരണം നേടിയ ‘കണ്ണൂര്‍ സ്‌ക്വാഡ്’ ഇപ്പോള്‍ കൂടുതല്‍ തിയേറ്ററുകളിലേക്ക് എത്തിയിരിക്കുകയാണ്. റോബി വര്‍ഗീസ് രാജ് സംവിധാനം ചെയ്ത ചിത്രത്തിന്റെ തിരക്കഥ ഒരുക്കിയിരിക്കുന്നത് മുഹമ്മദ് ഷാഫി, റോണി ഡേവിഡ് രാജ് എന്നിവര്‍ ചേര്‍ന്നാണ്. മമ്മൂട്ടി കമ്പനി നിർമിച്ച ചിത്രത്തിന് കൂടുതൽ ഷോകൾ ഉൾപ്പെടുത്തിയിരിക്കുകയാണ്. ചിത്രം വമ്പൻ ഹിറ്റിലേക്ക് കുതിക്കുമ്പോൾ പ്രേക്ഷകർക്ക് നന്ദി അറിയിച്ച് മമ്മൂട്ടിയും മമ്മൂട്ടി കമ്പനിയും. മുഴുവന്‍ ടീമിന്റെയും ആത്മാര്‍ത്ഥ പരിശ്രമം ചിത്രത്തിന് പിന്നിലുണ്ടായിരുന്നെന്ന് മമ്മൂട്ടി സോഷ്യല്‍ മീഡിയയില്‍ കുറിച്ചു.
‘കണ്ണൂര്‍ സ്‌ക്വാഡിനെ കുറിച്ചുള്ള നിങ്ങളുടെ നിരൂപണങ്ങളും അഭിപ്രായങ്ങളും ഞങ്ങള്‍ എല്ലാവരുടെയും ഹൃദയം നിറയ്ക്കുകയാണ്. നിങ്ങള്‍ ഓരോരുത്തരോടും ഒരുപാട് നന്ദിയുണ്ട്. ഞങ്ങള്‍ക്ക് ആഴത്തില്‍ വിശ്വാസമുണ്ടായിരുന്ന ഒരു സിനിമയാണിത്. ആത്മാര്‍ത്ഥമായി പരിശ്രമിച്ചിട്ടുമുണ്ട്. അതിന് ഒരുപാട് സ്നേഹം തിരിച്ച് കിട്ടുന്നത് കാണുമ്പോള്‍ ഒരുപാട് സന്തോഷം’, എന്നാണ് മമ്മൂട്ടിയുടെ വാക്കുകള്‍.
അതേസമയം, കേരളത്തില്‍ 165 കേന്ദ്രങ്ങളില്‍ മാത്രമായിരുന്നു വ്യാഴാഴ്ച ചിത്രത്തിന്റെ റിലീസ്. മികച്ച പ്രതികരണങ്ങള്‍ വന്നതോടെ 250 തിയേറ്ററുകളില്‍ റിലീസ് ചെയ്യുകയും ഷോകളുടെ എണ്ണം കൂട്ടുകയും ചെയ്തിട്ടുണ്ട്. കാസര്‍കോട് നടക്കുന്ന ഒരു കൊലപാതകത്തിന്റെ പിന്നിലെ പ്രതികളെ തേടി എ.എസ്.ഐ ജോര്‍ജ്, ജയന്‍, ജോസ്, മുഹമ്മദ് ഷാഫി എന്നിവര്‍ നടത്തുന്ന യാത്രയാണ് ചിത്രത്തിന്റെ പ്രമേയം. റോണി ഡേവിഡ്, ശബരീഷ് വര്‍മ, അസീസ് നെടുമങ്ങാട്, കിഷോര്‍, വിജയരാഘവന്‍ എന്നിവരാണ് ചിത്രത്തിലെ പ്രധാന കഥാപാത്രങ്ങള്‍.
Post Your Comments