വിജയ് ദേവരകൊണ്ടയും സാമന്തയും ഒന്നിക്കുന്ന പുതിയ ചിത്രം ഖുഷി വിജയമായതിന്റെ ആഹ്ലാദത്തിലാണ് സൂപ്പർ താരം സാമന്ത റൂത്ത് പ്രഭു. ചിത്രത്തിന്റെ വിജയവാർത്തകളിൽ താൻ ഇന്നേറെ സന്തോഷവതിയാണെന്നും താരം വ്യക്തമാക്കി.
ആരാധകരിൽ നിന്നും നിരൂപകരിൽ നിന്നും മികച്ച അഭിപ്രായം നേടി മുന്നേറുകയാണ് ചിത്രം. “ജീവിച്ചിരിക്കുന്ന ഏറ്റവും ഭാഗ്യവതി” എന്നാണ് നടി സാമന്ത റൂത്ത് പ്രഭു സ്വയം വിശേഷിപ്പിച്ചിരിക്കുന്നത്. കാലിഫോർണിയയിൽ അവധിക്കാലം ആഘോഷിക്കുകയാണ് നടി സാമന്ത. ശിവ നിർവാണ രചനയും സംവിധാനവും നിർവഹിച്ച തെലുങ്ക് ഭാഷയിലുള്ള റൊമാന്റിക് കോമഡി ചിത്രമാണ് ‘ഖുശി’, ചിത്രം 2023 സെപ്റ്റംബർ 1 നാണ് പുറത്തിറങ്ങിയത്.
വിപ്ലവ് ആയി വിജയും ആരാധ്യ എന്ന കഥാപാത്രമായി സാമന്തയും ചിത്രത്തിലെത്തുമ്പോൾ കെമിസ്ട്രി വർക്കൗട്ട് ആയെന്നാണ് ആരാധകർ പറയുന്നത്. വ്യത്യസ്ത കാഴ്ച്ചപ്പാടോടെ വിവാഹിതരാകുകയും പിന്നീട് ഉണ്ടാകുന്ന ജീവിതത്തിലെ പ്രശ്നങ്ങളുമാണ് ചിത്രത്തിന്റെ കഥ. ലൈഗറെന്ന സിനിമ കരിയറിലെ തന്നെ വൻ പരാജയമായി മാറിയ വിജയ് ദേവരകൊണ്ടയ്ക്ക് ആശ്വാസമായിരിക്കുകയാണ് സാമന്തയുമൊന്നിച്ച പുത്തൻ ചിത്രം. മലയാളിയായ ഹിഷാം അഹ്ദുൾ വഹാബാണ് ചിത്രത്തിലെ ഗാനങ്ങൾക്ക് ഈണം പകർന്നത്.
Post Your Comments