ലിയോയുടെ റിലീസിന് മുൻപേ ആഡംബര വാഹനം സ്വന്തമാക്കി ലോകേഷ് കനകരാജ്

ലോകേഷ് ചിത്രം ലിയോയുടെ റിലീസിനായി കാത്തിരിക്കുകയാണ് ആരാധകർ. ലോകേഷും വിജയും ഒന്നിക്കുന്ന ചിത്രത്തിനായി ഏറെ നാളായി കാത്തിരിക്കുകയാണ് ആരാധകർ.

ലിയോയുടെ റിലീസിന് മുൻപായി സംവിധായകൻ ലോകേഷ് ആഡംബര വാഹനം സ്വന്തമാക്കിയെന്ന വാർത്തകളാണ് പുറത്ത് വരുന്നത്. ബിഎംഡബ്ല്യു 7 സീരിസാണ് 1 കോടി 70 ലക്ഷത്തിന് സൂപ്പർ ഹിറ്റ് സംവിധായകൻ സ്വന്തമാക്കിയിരിയ്ക്കുന്നത്. അടുത്തിടെ പുറത്തിറങ്ങിയ ലോകേഷിന്റെ വിക്രം സൂപ്പർ ഹിറ്റായി മാറിയിരുന്നു. വൻ സ്വീകരണമാണ് പ്രേക്ഷകർ വിക്രമെന്ന ചിത്രത്തിന് നൽകിയത്. കമൽഹാസന്റെ വിക്രത്തിന് ശേഷം എത്തുന്ന ചിത്രമായതിനാൽ വൻ പ്രതീക്ഷയാണ് ആരാധകർ ലിയോയിലും വച്ചു പുലർത്തുന്നത്.

ലോകേഷ് – വിജയ് കൂട്ടുകെട്ടിൽ ഒരുങ്ങുന്ന ചിത്രത്തിൽ നായികയായെത്തുന്നത് തൃഷയാണ്. വിജയും തൃഷയും നീണ്ട 14 വർഷങ്ങൾക്ക് ശേഷം ഒരുമിക്കുന്ന ചിത്രം കൂടിയാണ് ലിയോ. ഹിറ്റ് ജോഡികളായ ഇരുവരെയും ഒരുമിച്ച് സ്ക്രീനിൽ വീണ്ടും കാണാൻ കഴിയുന്നതിന്റെ ആവേശത്തിലാണ് ആരാധകർ. കോളിവുഡിലെ പ്രീ റിലീസ് ബിസിനസിൽ ലിയോ ഒന്നാമതെത്തി കഴിഞ്ഞു എന്ന വാർത്തകളും പുറത്തെത്തുന്നുണ്ട്. കൂടാതെ, ലോകേഷ് കനകരാജ് ഉടൻ തന്നെ സൂപ്പർസ്റ്റാർ രജനികാന്തുമായി ഒരു വരാനിരിക്കുന്ന ചിത്രത്തിനായി സഹകരിക്കുമെന്ന് സൂചിപ്പിക്കുന്ന റിപ്പോർട്ടുകൾ പ്രചരിക്കുന്നുണ്ട്. ഒക്‌ടോബർ 19-നാണ് ലിയോ റിലീസ് ചെയ്യുന്നത്.