എനിക്കെതിരെ ഒരു ലോബി പ്രവർത്തിക്കുന്നുണ്ട്, എത്രയോ ചിത്രങ്ങളിൽ നിന്നും മാറ്റി നിർത്തപ്പെട്ടു: എം ജയചന്ദ്രൻ

മലയാള സിനിമാ രം​ഗത്ത് തനിക്കെതിരെ വലിയൊരു ലോബി പ്രവർത്തിക്കുന്നുണ്ടെന്ന് തുറന്നു പറഞ്ഞ് സം​ഗീത സംവിധായകൻ എം ജയചന്ദ്രൻ.

ഈ ലോബി കാരണം പല സിനിമകളിൽ നിന്നും തന്നെ പലപ്പോഴും മാറ്റി നിർത്തിയിട്ടുണ്ടെന്നും ജയചന്ദ്രൻ ആരോപിച്ചു.

ഈ അടുത്ത കാലത്ത് പോലും എനിക്കെതിരെ ഈ ലോബി പ്രവർത്തിച്ചു, പക്ഷേ ഈശ്വരന്റെ ലോബി എനിക്കൊപ്പം ഉണ്ടായിരുന്നു എന്നതിന്റെ തെളിവാണ് ഇത്തവണത്തെ സംസ്ഥാന പുരസ്കാരം എന്നും അദ്ദേഹം പറഞ്ഞു.

സിനിമയിൽ ഒറ്റയ്ക്ക് നടക്കുന്ന വ്യക്തിയാണ് ഞാൻ, രാഷ്ട്രീയത്തിൽ താൽപ്പര്യം ഇല്ല, സം​ഗീതമാണ് തന്റെ ലോകം. സിനിമയിൽ വന്നിട്ട് 28 വർഷമായി. രണ്ട് വർഷം കൂടി കഴി‍ഞ്ഞാൽ സിനിമയിൽ വന്നിട്ട് 30 വർഷം ആകുമെന്നും ജയചന്ദ്രൻ.

28 വർഷം സിനിമയിൽ നിലനിന്നിട്ടുണ്ടെങ്കിൽ അത് നെ​ഗറ്റീവുകൾക്ക് ചെവി കൊടുക്കാതിരുന്നതുകൊണ്ടാണെന്നും ജയചന്ദ്രൻ പറഞ്ഞു.