പിണറായി വിജയൻ സാറിന് നന്ദി പറഞ്ഞാണ് സിനിമ തുടങ്ങുന്നത്, പാർട്ടി വലിച്ചിടരുത്: പ്രതികരിച്ച് ജൂഡ് ആന്റണി ജോസഫ്

കേരളത്തിലെ വെള്ളപ്പൊക്കത്തെ അടിസ്ഥാനമാക്കിയുള്ള അതീജീവനത്തിന്റെ കഥ പറയുന്ന ചിത്രമാണ് ജൂഡിന്റെ 2018. ടൊവിനോ, ആസിഫ് അലി, കുഞ്ചാക്കോ ബോബൻ എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്.

വൻ സ്വീകരണമാണ് ജൂഡിന്റെ 2018 എവരിവൺ ഈസ് എ ഹീറോ എന്ന ചിത്രത്തിന് ലഭിക്കുന്നത്. എന്നാൽ മുഖ്യമന്ത്രി പിണറായി വിജയന് വേണ്ടത്ര പ്രാധാന്യം കൊടുത്തില്ല എന്ന ആരോപണവും ശക്തമാകുകയാണ്.

കുറിപ്പുകളും ചർച്ചകളുമായി അനുകൂലിച്ചും പ്രതികൂലിച്ചും ചിത്രത്തെക്കുറിച്ചുള്ള ചർച്ചകൾ പുരോ​ഗമിക്കുകയാണ്, എന്നാൽ വിശദീകരണവുമായി രം​ഗത്തെത്തിയിരിക്കുകയാണ് സംവിധായകൻ ജൂഡ് ആന്റണി ജോസഫ്.

സർക്കാരും പ്രതിപക്ഷവും കേന്ദ്ര സർക്കാരും നമ്മൾ ജനങ്ങളും തോളോട് ചേർന്ന് ചെയ്ത അത്യുഗ്രൻ കാലത്തിന്റെ ചെറിയൊരു ഓർമ്മപ്പെടുത്തലാണ് ഈ സിനിമയെന്ന് സംവിധായകൻ പറയുന്നു.

കുറിപ്പ് വായിക്കാം

പ്രിയ മുഖ്യമന്ത്രി സഖാവ് പിണറായി വിജയൻ സാറിനും പ്രതിപക്ഷ നേതാവ് വി ഡി സതീശൻ സാറിനും യൂസഫലി സാറിനും നന്ദി പറഞ്ഞു കൊണ്ടാണ് 2018 -Everyone is a hero എന്ന നമ്മൾ മലയാളികളുടെ സിനിമ തുടങ്ങുന്നത്.

സർക്കാരും പ്രതിപക്ഷവും കേന്ദ്ര സർക്കാരും നമ്മൾ ജനങ്ങളും തോളോട് ചേർന്ന് ചെയ്ത അത്യുഗ്രൻ കാലത്തിന്റെ ചെറിയൊരു ഓർമ്മപ്പെടുത്തലാണ് ഈ സിനിമ.

ഈ വിജയം നമ്മുടെ അല്ലെ? ഇതിൽ ജാതി, മതം, പാർട്ടി വലിച്ചിടുന്ന സഹോദരന്മാരോട്, വേണ്ട അളിയാ, വിട്ടു കള.