മാര്‍ച്ച്‌ 9നാണ് ബോളിവുഡ് നടനും സംവിധായകനും നിര്‍മ്മാതാവുമായ സതീഷ് കൗശിക് (66) അന്തരിച്ചത്. ഹൃദയാഘാതത്തെ തുടര്‍ന്നായിരുന്നു അന്ത്യമെന്നായിരുന്നു റിപ്പോര്‍ട്ട്. അതേ സമയം സതീഷ് കൗശിക്കിന്റെ മരണം സംബന്ധിച്ച്‌ വിവാദം തലപൊക്കിയിട്ടുണ്ട്. ഒരു സ്‍ത്രീ തന്റെ ഭര്‍ത്താവാണ് സതീഷ് കൗശികിനെ കൊലപ്പെടുത്തിയതെന്ന് പരാതിയുമായി രംഗത്ത് എത്തിയത് വിവാദമായിരുന്നു.
സതീഷ് കൗശിക് നല്‍കിയ 15 കോടി രൂപ തിരിച്ചു ചോദിച്ചതിനാണ് ഭര്‍ത്താവ് നടനെ കൊന്നത് എന്നാണ് ദില്ലി കേന്ദ്രമായി പ്രവര്‍ത്തിക്കുന്ന വ്യവസായിയുടെ ഭാര്യ പരാതിയില്‍ പറയുന്നത്. സതീഷ് കൗശിക്കിനെ തന്റെ ഭര്‍ത്താവ് ഗുളികകള്‍ നല്‍കി കൊലപ്പെടുത്തുകയായിരുന്നുവെന്നും, ഇത് കരുതിക്കൂട്ടിയുള്ള കൊലപാതകം ആയിരുന്നു എന്നുമാണ് പരാതിക്കാരിയായ സ്‍ത്രീ പറയുന്നത്. ‘കഴിഞ്ഞ ഓഗസ്റ്റ് 23ന് കൗശിക് തന്റെ വീട് സന്ദര്‍ശിക്കുകയും നേരത്തെ നല്‍കിയ 15 കോടി തിരിച്ചു വേണമെന്ന് ഭര്‍ത്താവിനോട് ആവശ്യപ്പെടുകയും ചെയ്തിരുന്നു. സതീഷ് കൗശികും ഭര്‍ത്താവും തര്‍ക്കിച്ചതിന് താന്‍ സാക്ഷിയാണ്. അന്ന് അധോലോക നായകന്‍ ദാവൂദ് ഇബ്രാഹിമിന്റെ മകനും ഉണ്ടായിരുന്നു. പണം വൈകാതെ തിരിച്ചു നല്‍കാം എന്ന് തന്റെ ഭര്‍ത്താവ് കൗശികിനോട് പറഞ്ഞിരുന്നു. താന്‍ അതിനെ കുറിച്ച്‌ ചോദിച്ചപ്പോള്‍ കൊവിഡ് കാലത്ത് പണം അദ്ദേഹത്തിന് നഷ്‍ടപ്പെട്ടുവന്നാണ് പറഞ്ഞത്. സതീഷ് കൗശിക്കിനെ ഒഴിവാക്കാന്‍ പോകുകയാണ് എന്ന് ഭര്‍ത്താവ് പറഞ്ഞിരുന്നു’ പരാതിക്കാരി കൂട്ടിച്ചേർത്തു. കഴിഞ്ഞ ദിവസം ദില്ലി പൊലീസ് ഈ സ്ത്രീയെ ചോദ്യം ചെയ്തുവെന്നാണ് വിവരം. ദുബായില്‍ കൗശിക് ഒരു പാര്‍ട്ടിയില്‍ പങ്കെടുക്കുന്നതിന്റെ ഫോട്ടോയും പരാതിക്കാരി പൊലീസിന് നൽകിയിട്ടുണ്ട്.
സതീഷ് ഭാര്യ ശശി കൗശിക്കിനും 11 വയസ്സുള്ള മകള്‍ വന്‍ഷികയ്ക്കും ഒപ്പമാണ് താമസിച്ചിരുന്നത്. പിതാവിന്റെ മരണത്തിന് പിന്നാലെ വന്‍ഷിക തന്റെ പിതാവിനൊപ്പം നില്‍ക്കുന്ന ഒരു ചിത്രം ഇന്‍സ്റ്റഗ്രാമില്‍ പങ്കുവച്ചിരുന്നു. മാത്രവുമല്ല സതീഷിന്റെ ഇന്‍സ്റ്റഗ്രാമിലെ പോസ്റ്റുകളില്‍ മകളെ ടാഗ് ചെയ്തിരുന്നു. എന്നാല്‍ ഇപ്പോള്‍ വന്‍ഷികയുടെ അക്കൌണ്ട് അപ്രത്യക്ഷമായിരിക്കുകയാണ്. വന്‍ഷികയുടെ അക്കൌണ്ട് @vanshika_kaesthetic എന്ന പേരിലാണ് ഉണ്ടായിരുന്നത്.
Post Your Comments