എനിക്കൊരു ചോയ്‌സ് നൽകിയിരുന്നെങ്കിൽ ഞാൻ ടീസർ ഒരിക്കലും യൂട്യൂബിൽ ഇടില്ലായിരുന്നു: ഓം റാവത്ത്

പ്രഭാസ് നായകനായി എത്തുന്ന ബി​ഗ് ബജറ്റ് ചിത്രമാണ് ‘ആദിപുരുഷ്’. ചിത്രത്തിന്റെ ടീസർ പുറത്തുവിട്ടതിന് പിന്നാലെ നിരവധി ട്രോളുകൾ സോഷ്യൽ മീഡിയയിൽ നിറഞ്ഞിരുന്നു. ഇപ്പോഴിതാ, ട്രോളുകളിൽ പ്രതികരണവുമായി സംവിധായകൻ ഓം റാവത്ത് രംഗത്തെത്തി. ടീസറിനെതിരെ ഉയരുന്ന ട്രോളുകളിൽ അത്ഭുതം തോന്നുന്നില്ലെന്നും ചിത്രം ബി​ഗ് സ്ക്രീനിനായി ഒരുക്കിയതാണെന്നും സംവിധായകൻ പറഞ്ഞു.

‘ഞാൻ നിരാശനായിരുന്നു. അതിൽ അതിശയിക്കാനില്ല, കാരണം ഈ സിനിമ ബിഗ് സ്‌ക്രീനിനായി ഒരുക്കിയതാണ്. എനിക്കൊരു ചോയ്‌സ് നൽകിയിരുന്നെങ്കിൽ ഞാൻ ടീസർ ഒരിക്കലും യൂട്യൂബിൽ ഇടില്ലായിരുന്നു. പക്ഷേ അത് കാലഘട്ടത്തിന്റെ ആവശ്യമാണ്. വലിയ തോതിൽ പ്രേക്ഷകരിലേക്ക് എത്തണമെങ്കിൽ ഇവിടെ പ്രദർശിപ്പിച്ചേ മതിയാകൂ’.

‘ടി-സീരീസിന്റേത് ലോകത്തിലെ ഏറ്റവും വലിയ യൂട്യൂബ് ചാനലാണ്. എല്ലാ തരം പ്രേക്ഷകരെയും ഈ സിനിമയ്ക്ക് ആവശ്യമാണ്. ഈ പ്രതികരണങ്ങളിൽ എനിക്ക് അതിശയം ഒന്നും തോന്നിയില്ല. ചെറിയ സ്‌ക്രീനിനായി നിർമ്മിച്ചതല്ല സിനിമ, ബിഗ് സ്‌ക്രീനിനായി നിർമ്മിച്ചതാണ്. മൊബൈല്‍ ഫോണില്‍ കാണുമ്പോള്‍ പൂര്‍ണതയില്‍ എത്തുകയില്ല. 3 ഡിയില്‍ കാണുമ്പോള്‍ അത് മനസ്സിലാകും’ ഓം റാവത്ത് പറഞ്ഞു.

Read Also:- ബിജു മേനോന്റെ ‘ഒരു തെക്കൻ തല്ല് കേസ്’ ഒടിടി റിലീസ് പ്രഖ്യാപിച്ചു

രാമായണ കഥയെ അടിസ്ഥാനമാക്കി ഓം റാവത്ത് സംവിധാനം ചെയ്യുന്ന ‘ആദിപുരുഷ്’ 2023ലെ വമ്പൻ റിലീസുകളിൽ ഒന്നാണ്. 2023 ജനുവരി 12ന് ചിത്രം പ്രദർശനത്തിനെത്തും. ഹിന്ദിക്കും തെലുങ്കിനും പുറമെ ചിത്രം തമിഴിലും മലയാളത്തിലും കന്നഡയിലും മൊഴിമാറ്റിയും പ്രദർശനത്തിനെത്തും. ഐമാക്സ് 3ഡി ഫോര്‍മാറ്റിലും ചിത്രം പ്രദർശനത്തിനെത്തിക്കുന്നുണ്ട്.