മിനിട്ടുകൾക്കുള്ളിൽ ദുൽഖറിന്റെ ‘ചുപ്പി’ന്റെ ടിക്കറ്റുകൾ കരസ്ഥമാക്കി പ്രേക്ഷകർ

സിനിമ ആസ്വാദകർ പ്രതീക്ഷയോടെ കാത്തിരിക്കുന്ന ദുൽഖർ ചിത്രം ‘ചുപ്: റിവെഞ്ച് ഓഫ് ദ് ആർട്ടിസ്റ്റ്’ സിനിമ പ്രേമികൾക്ക് സൗജന്യമായി കാണാൻ അവസരം നൽകി അണിയറ പ്രവർത്തകർ. ഒന്നര മിനുട്ടിനുള്ളിൽ കേരളത്തിലെ മുഴുവൻ ടിക്കറ്റുകളും ബുക്ക് ചെയ്യപ്പെട്ടു. ഇന്ത്യയിലെ എല്ലാ തിയേറ്ററുകളിലും പത്തു മിനിട്ടിനുള്ളിൽ ടിക്കറ്റുകൾ പ്രേക്ഷകർ കരസ്ഥമാക്കി. സെപ്റ്റംബർ 23ന് ലോകവ്യാപകമായി തിയേറ്ററുകളിൽ എത്തുന്ന ചിത്രം റിലീസിന് മൂന്ന് ദിവസം മുമ്പേയാണ് ഫ്രീയായി കാണാനുള്ള അവസരം ആരാധകർക്ക് ലഭിച്ചത്. പൊതുവേ നിരൂപകർക്കും സിനിമ രംഗത്തെ സെലിബ്രിറ്റികൾക്കും മാത്രമായി ഒരുക്കാറുള്ള പ്രിവ്യൂ ഷോ ഇത്തവണ പ്രേക്ഷകർക്കെല്ലാവർക്കുമായി അണിയറ പ്രവർത്തകർ ഒരുക്കി പുതിയ ഒരു പ്രൊമോഷൻ രീതിക്കു തുടക്കമിട്ടു.

Also Read: സ്റ്റെഫി സേവ്യർ സംവിധായികയാകുന്നു: ചിത്രത്തിന് തുടക്കമായി

ഇന്ത്യയിലെ തെരഞ്ഞെടുക്കപ്പെട്ട നഗരങ്ങളിൽ (മുംബൈ, അഹമ്മദാബാദ്, ലക്ക്‌നൗ, ജയ്‌പൂർ, ബാംഗ്ലൂർ, കൊച്ചി, പൂനെ, ഡൽഹി, ഗുർഗാവാൻ, കൊൽക്കത്ത, ഹൈദരാബാദ്, ചെന്നൈ) ചിത്രം റിലീസ് ചെയ്യുന്നതിന് മുന്നേ ഇന്ന് ഉച്ചക്ക് 12 മണിക്കാണ് ബുക്കിങ് ആരംഭിച്ചത്. സെപ്റ്റംബർ 20ന് നടക്കുന്ന പ്രിവ്യൂ ഷോയിലേക്ക് ബുക്ക് മൈ ഷോയിലൂടെയാണ് ടിക്കറ്റുകൾ ഫ്രീ ആയി പ്രേക്ഷകർ ഇന്ത്യയിൽ പത്തുമിനിറ്റുനുള്ളിൽ ബുക്ക് ചെയ്തത്.

ദുൽഖറിന്റെ മൂന്നാമത്തെ ബോളിവുഡ് ചിത്രമാണ് ഇത്. ആർ ബാൽകി ആണ് സംവിധായകൻ. ബാൽകിക്കൊപ്പം രാജ സെൻ, റിഷി വിർമാനി എന്നിവർ ചേർന്നാണ് തിരക്കഥ, സംഭാഷണം ഒരുക്കിയിരിക്കുന്നത്. സണ്ണി ഡിയോൺ, പൂജ ബട്ട്, ശ്രേയ ധന്വന്തരി എന്നിവരാണ് ചിത്രത്തിലെ മറ്റ് താരങ്ങൾ. ത്രില്ലടിപ്പിച്ച ചുപ്പിന്റെ ട്രെയിലറിന് ഇതുവരെ ഒരു കോടിയിൽ പരം കാഴ്ചക്കാരാണ്. പാൻ ഇന്ത്യൻ സൂപ്പർ സ്റ്റാർ ദുൽഖർ സൽമാൻ തിയേറ്ററിൽ ‘ചുപ്പി’ലൂടെ ഗംഭീര പ്രകടനം നടത്തുമെന്ന് ഉറപ്പുതരികയാണ് ട്രെയിലർ. സെപ്റ്റംബർ 23 ന് ഇന്ത്യയൊട്ടാകെ ചിത്രം തിയേറ്ററിലെത്തും. പിആർഒ – പ്രതീഷ് ശേഖർ.