കണ്ണൂരിന്റെ രാഷ്ട്രീയം പറഞ്ഞ് ‘കൊത്ത്’: സിബി മലയിൽ ചിത്രത്തിന്റെ മേക്കിം​ഗ് വീഡിയോ

ആസിഫ് അലി, റോഷൻ മാത്യു എന്നിവരെ കേന്ദ്ര കഥാപാത്രങ്ങളാക്കി സിബി മലയിൽ ഒരുക്കുന്ന ചിത്രമാണ് ‘കൊത്ത്’. കണ്ണൂരിന്റെ രാഷ്ട്രീയവും രാഷ്ട്രീയ കൊലപാതകങ്ങളുടെ പകയുമാണ് ചിത്രം പറയുന്നതെന്നാണ് സൂചന. കുടുംബ ബന്ധങ്ങളുടെയും സൗഹൃദത്തിൻ്റെയും പശ്ചാത്തലത്തിലൂടെ ശക്തമായ സാമൂഹ്യ വിഷയം അവതരിപ്പിക്കുകയാണ് ഈ ചിത്രം. ഷാനു, സുമേഷ് എന്നീ രണ്ടു ചെറുപ്പക്കാരെ പ്രധാനമായും കേന്ദ്രീകരിച്ചാണ് സിനിമ പുരോ​ഗമിക്കുന്നത്.

സെപ്റ്റംബർ 23ന് എത്തുമെന്ന് നേരത്തെ പ്രഖ്യാപിച്ചിരുന്ന ചിത്രം ഒരാഴ്ച മുൻപ് പ്രദർശനം ആരംഭിക്കുമെന്ന് അണിയറക്കാർ അറിയിച്ചിരുന്നു. സെപ്റ്റംബർ 16 ആണ് പുതിയ റിലീസ് തീയതി. ഇപ്പോളിതാ, സിനിമയുടെ മേക്കിം​ഗ് വീഡിയോ പുറത്തിറക്കിയിരിക്കുകയാണ് അണിറയ പ്രവർത്തകർ. റിലീസിന് മുന്നോടിയായിട്ടാണ് മേക്കിംഗ് വീഡിയോ പുറത്തുവിട്ടിരിക്കുന്നത്. റിലീസ് ചെയ്ത് മണിക്കുറുകൾക്കകം നിരവധി പേരാണ് വീഡിയോ കണ്ടത്. റോഷൻ മാത്യു, ആസിഫ് അലി എന്നിവരുടെ രം​ഗങ്ങളാണ് വീഡിയോയിലുള്ളത്.

Also Read: ദുൽഖർ സൽമാന്റെ അനൗൺസ്‌മെന്റിലൂടെ കല്യാണിയുടെ പുതിയ ചിത്രം ‘ശേഷം മൈക്കിൽ ഫാത്തിമ’

ഗോൾഡ് കോയിൻ മോഷൻ പിക്ചേഴ്സിന്റെ ബാനറിൽ രഞ്ജിത്തും പി എം ശശിധരനും ചേർന്നാണ് ഈ ചിത്രം നിർമ്മിക്കുന്നത്. ഹേമന്ത് കുമാറാണ് ചിത്രത്തിന്റെ രചന നിർവ്വഹിച്ചിരിക്കുന്നത്. മനു മഞ്ജിത്ത്, ഹരി നാരായണൻ എന്നിവരുടെ വരികൾക്ക് കൈലാസ് മേനോൻ ഈണം പകർന്നിരിക്കുന്നു. ഈസ്റ്റ് കോസ്റ്റാണ് ചിത്രത്തിലെ ​ഗാനങ്ങൾ ആസ്വാദകരിലേക്ക് എത്തിക്കുന്നത്.

നിഖില വിമലാണ് ചിത്രത്തിൽ നായികയായെത്തുന്നത്. രഞ്ജിത്തും ഈ ചിത്രത്തിലെ മറ്റൊരു പ്രധാന കഥാപാത്രമായി എത്തുന്നുണ്ട്. ശ്രീജിത്ത് രവി, വിജിലേഷ്, ശ്രീലക്ഷമി, ശിവൻ സോപാനം, അതുൽ രാംകുമാർ, ദിനേശ് ആലപ്പി എന്നിവരോടൊപ്പം നിരവധി പുതുമുഖങ്ങളും ചിത്രത്തിൽ അണിനിരക്കുന്നുണ്ട്.