മമ്മൂട്ടിയുടെ തകർപ്പൻ പ്രകടനം: പിറന്നാൾ ദിനത്തിൽ ‘റോഷാക്ക്’ ട്രെയിലർ എത്തി

മമ്മൂട്ടി നായകനാകുന്ന പുതിയ ചിത്രം ‘റോഷക്കി’ന്റെ ട്രെയിലർ റിലീസ് ചെയ്തു. മമ്മൂട്ടിയുടെ പിറന്നാൾ ദിനത്തിലാണ് ട്രെയിലർ എത്തിയത്. ദുൽഖർ സൽമാന്റെ യൂട്യൂബ് ചാനലിലൂടെയാണ് ട്രെയിലർ റിലീസ് ചെയ്തത്. മമ്മൂട്ടി കമ്പനി അവതരിപ്പിക്കുന്ന രണ്ടാമത്തെ ചിത്രമാണിത്. പോസ്റ്റർ, മേക്കിങ്ങ് വീഡിയോകളിലെ നിഗൂഢത നിലനിർത്തിയാണ് ട്രെയ്‌ലറും എത്തിയിരിക്കുന്നത്. മമ്മൂട്ടിയുടെ സംഘട്ടനവും പ്രകടനവുമാണ് ട്രെയിലറിലുള്ളത്. ലൂക്ക് ആന്റണി എന്ന കഥാപാത്രത്തെയാണ് മമ്മൂട്ടി ‘റോഷാക്കി’ൽ അവതരിപ്പിക്കുന്നത്.

Also Read: ‘ഓണപ്പൂക്കളം’ മ്യൂസിക്ക് ആൽബം ശ്രദ്ധേയമാകുന്നു

‘കെട്ട്യോളാണെന്റെ മാലാഖ’ എന്ന ചിത്രത്തിലൂടെ ശ്രദ്ധേയനായ സംവിധായകൻ നിസാം ബഷീറാണ് ചിത്രം സംവിധാനം ചെയ്യുന്നത്. സെപ്റ്റംബർ 29ന് ചിത്രം തിയറ്ററുകളിൽ എത്തും. ത്രില്ലർ വിഭാഗത്തിൽപ്പെടുന്ന ചിത്രമാണിത്. ഷറഫുദ്ദീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, സഞ്ജു ശിവറാം, കോട്ടയം നസീർ, ബാബു അന്നൂർ, മണി ഷൊർണ്ണൂർ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.

ചിത്രത്തിന്റെ തിരക്കഥ ഒരുക്കുന്നത് സമീർ അബ്ദുൾ ആണ്. നിമിഷ് രവിയാണ് ഛായാഗ്രഹണം നിർവ്വഹിക്കുന്നത്. ചിത്രത്തിലെ ​ഗാനങ്ങൾക്ക് സംഗീതം നൽകുന്നത് മിഥുൻ മുകുന്ദൻ ആണ്.