ബോളിവുഡിന്റെ മനം കവരാൻ സീതയും റാമും എത്തുന്നു: സീതാരാമം ഹിന്ദി പതിപ്പ് തിയേറ്ററിൽ

ദുൽഖർ സൽമാൻ, മൃണാൽ താക്കൂർ, രശ്മിക മന്ദാന എന്നിവരെ കേന്ദ്ര കഥാപാത്രങ്ങളാക്കി ഹനു ​രാഘവപുടി ഒരുക്കിയ സീതാരാമം തിയേറ്ററുകളിൽ മികച്ച പ്രതികരണം നേടി മുന്നേറുകയാണ്. ആ​ഗസ്റ്റ് 5ന് തെലുങ്ക്, മലയാളം, തമിഴ് ഭാഷകളിലാണ് ചിത്രം പ്രദർശനത്തിന് എത്തിയത്. വൈജയന്തി മൂവീസും സ്വപ്‍ന സിനിമയും ചേർന്ന് നിർമ്മിച്ച ചിത്രം തെന്നിന്ത്യൻ ഭാഷാ പതിപ്പുകളിൽ നിന്നു മാത്രം 75 കോടി ആഗോള ഗ്രോസ് നേടിയിരുന്നു.

ഇപ്പോളിതാ, ഒരു മാസത്തിനിപ്പുറം ചിത്രത്തിന്റെ ഹിന്ദി പതിപ്പും തിയേറ്ററുകളിലെത്തിയിരിക്കുകയാണ്. ഡോ. ജയന്തിലാൽ ഗാഡയുടെ പെൻ സ്റ്റുഡിയോസ് ആണ് ചിത്രം ഹിന്ദിയിൽ അവതരിപ്പിക്കുന്നത്. തെന്നിന്ത്യയിൽ നിന്ന് ചിത്രത്തിന് ലഭിച്ച സ്വീകാര്യത ബോളിവുഡിൽ നിന്നും ലഭിക്കുമെന്നാണ് അണിയറക്കാരുടെ പ്രതീക്ഷ.

Also Read: അക്ഷയ് കുമാറിന്റെ ‘കട്‍പുത്‍ലി’ ഡിസ്നി പ്ലസ് ഹോട്ട്സ്റ്റാറില്‍

ദുൽഖർ സൽമാൻ ലെഫ്റ്റനന്റ് റാം എന്ന കഥാപാത്രമായാണ് ചിത്രത്തിൽ എത്തുന്നത്. മൃണാൾ താക്കൂർ സീതയായും രശ്മിക മന്ദാന അഫ്രീൻ ആയുമാണ് ചിത്രത്തിൽ എത്തുന്നത്. സുമന്ത്, തരുൺ ഭാസ്‌കർ, ഗൗതം വാസുദേവ് മേനോൻ, ഭൂമിക ചൗള എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.